اسم السجين (اسم الشهرة) : احمد ماهر ابراهيم الطنطاوي (احمد ماهر)

النوع الاجتماعي : ذكر

تاريخ تحرير أو نشر الرسالة : 2/10/2014

السن وقت الاحتجاز: 35 عام

الوظيفة – نشاط بالمجال العام: مهندس – مؤسس حركة 6 أبريل

مكان احتجاز المرسل : منطقة سجون طرة

سيادة الباشا المستشار المستقِل … الموضوع سهل وبسيط

سياده الباشا المستشار المستقِل … الموضوع سهل وبسيط في الرسالة دي هاحكي قصة مهمة ليا في الوقت الحالي، اغلب الظن انها قصة مملة ولا تهمك فى شىء.. فضفضه.. فكك منها، لكن لو أهتميت وحبيت تتابع لو لقيت نفسك تقدر تفيد فيبقى كويس برضه هي قصة تليق اكتر تتقال في برنامج همسة عتاب او برنامج حياتى اللي كان بيجي زمان يوم الجمعة أو أي برنامج بيوجه رسالة للسادة المسؤليين اللي الطبيعي انهم ينفضوا أو يجاوبوا إجابات هبلة القصة تعود جذورها لقبل الثوره، لا، لاواخر تسعينات القرن الماضي وقتها كنت لسه طالب فى كلية الهندسة ومعايا عربية 128 -بتاعة والدي اصلا بس ضربت عليها منه في نهاية التسعينيات وبداية الالفينات كانت الـ128 تعتبر عربية وكن ممكن اتنطط بيها على العيال فى الجامعه كنت مسميها زقزوقة وكانت عربيه زى الفل وبتجري وبتعمل أجدع مشاوير اتخرجت في 2004 والعربية فضلت معايا اروح بيها الشغل بس المشكله ان كان شغلي في مواقع في الصحراء كان لسه التجمع الخامس واكتوبر صحراء وكنت بلف على كذا موقع في اماكن بعيده وبمشي حوالي 150 كم في اليوم وكل يوم وفي وسط صحراء وطرق مبهدلة ومع مرور السنين وسهولة الحصول على سيارة جديدة وانتشار السيارات في مصر عن طريق نظام التقسيط من البنك، بقت الـ128 شكلها يكسف بصراحة وكمان اتبهدلت في الصحراء وكل يوم عايزه ميكانيكي وبتعطل كتير وسط الجبل وتسبب مواقف صعبة بصراحه انا كنت بحب زقزوقة ومش هاين عليا اسيبها خصوصا انها شافت معايا كتير، وياما وزعت بيها منشورات وياما كنت بنقل فيها العيال يرشوا سبراى ويعملى جرافيتى قبل الثورة، ومرة قلبتها تاكسي بالنفر ايام مطاردة أمن الدوله في 2008 ولكن في 2010 وصلت لحالة سيئة ومابقاش ينفع تستحمل مشوار يومي من التجمع للطريق الصحراوى رايح جاى فبدأ اجمع مقدم عربية جديدة . وبعد ما عملت جمعية وصرفتها وعملت واحدة تانية وصرفتها لكن التالته نفعت وكملت عليها من مكافأت نهاية الخدمة بعد قضية ضد الشغل فى المحاكم (موضوع طويل وخنيق) المهم جمعت 25 الف وقررت أجيب عربية رينو لوجان أرخص عربي’ مش صينى فى مصر … كانت وقتها عاملة 68 ألف ، دفعت المقدم فى سبتمبر 2010 واستلمتها بعد الثوره، القسط 1280 جنيه شهريا، معقول ومش بطال والتقسيط مع شركه كونتكت لتقسيط السيارات .. كويس كل إللي فات مقدمة مالهاش أى لازمة المشكلة أني عملت حادثة في مايو 2013، كنت ماشى على الدائري في يوم قبل الفجر كده ومروح البيت لقيت مقطورة على شمالى خبطاني راحت منزلاني تحت مقطورة تانية علي يميني، العربية اتفرمت بالكامل ولكن ربنا سترها معايا وطلعت من العربيه حي ما عدا بعض الجروح والكدمات …الحمد لله . العربية اكيد متأمن عليها لانها بالقسط، التأمين مع شركه مصر للتأمين , وبعد إجراءات طويييييييلة ومملة وخنيقة وروتين وفوت علينا بكرة واطلع فوق وانزل تحت وماعليش الملف في الدرج والمفتاح مع موظف في أجازه وبعد 6 شهور من إجراءات خنيقة في شركة مصر للتأمين تم انهاء اجراءات التعويض والشيك جاهز. أخير هاخد الشيك وأديه لشركه كونتاكت (اصل العربيه تقسيط وعليها حظر بيع ولسه فاضل عليا 10 شهور×1280 جنيه هوب .. اتحبست .. ضبط وإحضار بتهمة التحريض على التظاهر .. وهوب حكم 3 سنين سجن! شركة كونتاكت ليها اقساط متأخرة، والتأخير بيعمل غرمات تأخير والغرمات دى بتتضاعف كل يوم، والشهور بتعدى الحل الوحيد ان فى اسرع وقت يتاخد الشيك من مصر للتامين ويروح لشركة كونتاكت وتتخصم الاقساط اللي باقية والباقي يعتبر مقدم لسياره أخرى مستعملة بدل الى راحت في الحادثة وبما اني في السجن لازم حد آخر معاه توكيل يكمل الاجراءات الموضوع لغاية دلوقتي سهل اهوه … عدى 8 شهور وفاضله على حد معاه توكيل يكمل اخر الاجراءات . طيب ايه اللي معطل التوكيل، بدل الغرامات عمالة تزيد، التوكيل عايز اذن نيابه …طيب ايه المشكله ؟ المشكله ان النيابه بتكمل عقاب ومش بتعمل اي اذن او تصريح اهل او محاميين .. ليه؟ .. كده ومن هنا نناشد الساده المسئوليين بالسماح لي انى اعمل توكيل لزوجتى او اى حد من اهلى وانا من جوه السجن.. دى حاجة قانونية وعادي ومش عيب، والسجن بيقول لازم اذن نيابة الاول . السيد المستشار المبجل المستقل النائب العام طبعا اكيد الكلام الى بيتقال ان النيابه بتاخد اوامر من الداخليه كله اشاعات .. القضاء عندنا مستقل جدا…جدا….جدا هل ممكن السماح بعمل توكيل من جوه السجن حاجة عادى ومش عيب ولا حرام . السيد المستشار المبجل رئيس محكمه الاستئناف طبعا الكلام اللى بيقال ان القضاء غير مستقل كلام فارغ كلنا عارفيين ان القضاء زى الفل ولا يمكن القضاء ياخد أوامر من السلطه التنفيذيه بتكدير مسجون ….هاه ؟ ايه العيب فى تصريح نيابه او محكمه يمكننى من عمل توكيل لاهلى المفروض انكم القضاة والنيابه واللى عارفين كويس الديون اللى عليا والاقساط واللى فتشتوا كتير قبل كده وعارفيين كويس إن العربية بالقسط وفيه تأخير وغرمات تأخير كل اللى عايزه تصريح عشان اعرف اعمل تصريح لاهلى الموضوع سهل وبسيط ومش عيب مش هيبقى سجن وخراب ديار لا عندنا ثروات ولا ممتلكات ولا قصور وسيارات زى عِليه القوم ولا عندنا ديون بنك بالملايين وسارقيين اموال الشعب زى رجال اعمال ما قبل 25 يناير كل الى عايزه حقى فى انى اعمل توكيل .. بس