اسم السجين (اسم الشهرة) : عبد الرحمن محمد مصطفي المرسي الجندي (عبد الرحمن الجندي)

النوع الاجتماعي : ذكر

تاريخ تحرير أو نشر الرسالة : 9/27/2014

السن وقت الاحتجاز: 18 عام

الوظيفة – نشاط بالمجال العام: طالب بكلية الهندسة بالجامعة الألمانية بالقاهرة

مكان احتجاز المرسل : منطقة سجون طرة

خدونا يوم الاثنين 22/9 من سجن المرج للجلسة

خدونا يوم الاثنين 22/9 من سجن المرج للجلسة على أساس اننا راجعين عادى زى كل مرة ، و بعد الجلسة قالولنا إن المرافعة هتكون 3 أيام ورا بعض فهنقعد فى طرة ، من غير ما نكون عاملين حسابنا و معناش أى هدوم أو أكل أو شرب ، الهدوم اللى لابسينها و بس ، خدونا على استقبال طرة قالولهم مفيش مكان ، راحوا واخدينّا ليمان طرة و فتشونا و قسمونا نصين ، 30 فى كل أوضة ، و نمنا بهدومنا و عرقنا على الأرض ، حاطين دماغنا على الجزم كمخدات ، و مأكلناش أى حاجة من الصبح.
تانى يوم الصبح خدونا الجلسة ، و بعدها رجعنا على استقبال طرة بليل و احنا بقالنا يومين مأكلناش حاجة و لابسين نفس الهدوم ، و دخلونا زنازين هناك فى عنبر (أ) ،
قسمونا فى 7 زنازين كل زنزانة فيها 9 أو 8 ، زنزانتنا كان مفيهاش نور و لا مروحة و لا شفاط و ضيقة و كلها صراصير و حشرات ، حاولنا ننضفها على قد ما نقدر ، بعدها الشباب المعتقلين فى العنبر بتاعنا من الأوض التانية القديمة من قضية الفتح و معتقلين أمن الدولة لمولنا أكل (عيش و جبنة) و كام بطانية و جابوهوملنا و نمنا للصبح على كده ، صحينا و خدونا الجلسة و بعد ما المحاميين خلصوا مرافعة القاضى حجز جلسة يوم الثلاثاء 30/9 للنطق بالحكم ، و رجعونا طرة و قالولنا اننا هنتسَكِّن هناك و مش هنرجع السجن فى المرج تانى ، و كل حاجتنا هناك اللى عندنا بقالها سنة اللى تمنها عشرات الآلاف (حاجات حوالى 50 شخص) ضاعت ، و احنا قاعدين بقالنا 3 أيام مأكلناش و لا استحمينا و لا غيَّرنا هدومنا ، و اتفرقنا عن بعض.
يوم الخميس جالنا أول زيارة بتصريح نيابة احنا و اتنين كمان و اتبهدلنا فى الزيارة من الزحمة و كنا كلنا واقفين و مفيش مكان نقعد فيه ، و بعد الزيارة وقفنا ساعتين عقبال ما اتفتشنا ، و بعدها طلعنا و استحمينا و أكلنا بعد الزيارة لأول مرة من 3 أيام.
(المياه بتيجى 5 أو 10 دقايق قبل الصلاة)
(الأكل مش بييجى غير على العصر أو بعده مرة واحدة فى اليوم)