اسم السجين (اسم الشهرة) : فاطمه نصار محمد ابراهيم نصار (فاطمه نصار)

النوع الاجتماعي : أنثى

تاريخ تحرير أو نشر الرسالة : 3/9/2015

السن وقت الاحتجاز: 22 عام

الوظيفة – نشاط بالمجال العام: طالبة بكلية التجارة بجامعة الإسكندرية

مكان احتجاز المرسل : سجن دمنهور العمومي (الأبعادية)

كان نفسى اكتب بلون تانى

(بسم الله الرحمن الرحيم)
بعد الصلاة والسلام على رسول الله صلى الله عليه وسلم
كان نفسى اكتب بلون تانى بس لقيت ده انسب لون بعد إعدام محمود رمضان
بما إن دمنا بقى عادى ﻷى حد ، بما إن القهر فى قلوبنا بيزيد موش بيقل ..
الخبر نزل عليا أنا باﻷخص زى الصاعقه كأن ماس كهربا مسك فيا ،، شعور عاجزه عن وصفه حقيقى ..
ال7 شهور اللى قضيتهم فى المديريه دول على اد ما اثروا عليا باﻹيجاب على اد ما اثروا عليا بالسلب فى نفس الوقت ..
عرفت ناس كثيره جدا وطبعى الغريب اللى موش بعرف اغيروا بحس كل الناس أنا و قلبى بيوجعنى عليهم ، كان من ضمن الناس دى كان ‫‏محمود‬ .
دار بينى وبينه حوار بسيط جدا ..
كان قعد يومين فى المديريه عشان كان عنده جلسه او طب شرعى تقريبا وكان معاه واحد غلبان جدا بيخاف من همس الهوى حتى إن يعدى من جنبه .. عرفت ان هو لما لقيت مخبر هناك بيشتم عليهم وكدا ..
كلمته قولتله هو حضرتك فعلا بتاع حادث سيدى جابر ، قال لى : آه
استغربت فعلا ، قولتله : ايه اللى حصل ؟
بصلى بصه عجيبه فعلا لحد دلوقتى قهرانى فعلا .
بعدها رد وقال لى : والله ما قتلته أنا آه زئيته بس زى اتنين بيتخنقوا يا هو يزئنى يا أنا ، فهو ده بس اللى حصل والله .
بصيت وسكتت
استغرب جدا بئا وقتها لما عرف إنى سياسى ومحبوسه كل المده دى وهو محدش عملكم حاجه واسئله غريبه كدا وكان ردى ابتسامه فقط ردا على اسئلته دى ..
حوار بسيط دار بينى وبينه عمل بصمه فى حياتى ..
صوته فى القرآن تحفه ودعائه كان بيهز المكان فعلا وكانت زنزانتى جنبه على طول ..
راح “محمود” ضحية شعب متخلف ولسه البقيه تأتى ..
نظرتى لصورته فى الجورنال تخيلت نفسى مكانه بالنسبه للتهم المنسوبه لى وانهارت بالبكاء حقيقة ..
اسرع حكم اعدام سنه و 8 شهور إنها البدايه يا ساده مثل اى شئ يحدث .. يجربوا الاول ويشوفوا رد فعل الواقع ايه !
وبعدها تتسلسل باقى الابرياء على حبل المشنقه “محمود” التجربه الاولى ويا عالم مين هيحصل “محمود”
هو فى دار الحق واحنا فى دار الباطل
تقبله الله فى الشهداء وانزل السكينو على قلوب محبيه وزوجته باﻷخص ..
هو هيكون شهيد ؟!
ولا احنا ايه ؟! بس موش عارفه
ولا صحيح الجديد ‫#‏اقرار_التوبه_ده_كمان‬ !
اﻵن لا أفهم شيئا
فقدت الشعور بكل حاجه
‫#‏حسبى_الله_وكفى‬
‫#‏الى_الله_المشتكى‬
النزيله : ‫فاطمه نصار
الاثنين 9/3/2015
ع1غ9
سجن الابعادية