اسم السجين (اسم الشهرة) : كريم العطار

النوع الاجتماعي : ذكر

تاريخ تحرير أو نشر الرسالة : 4/16/2016

السن وقت الاحتجاز: غير معلوم

الوظيفة – نشاط بالمجال العام: محامي

مكان احتجاز المرسل : مكان احتجاز غير معلوم

السجن وحش جداً جداً وبيموت كل حاجة حلوة فينا

“السجن وحش جداً جداً وبيموت كل حاجة حلوة فينا” طلع في الحبس مظاليم كتير جداً يا مصطفي والعصابة اللي حكمانا جبروتها فاق المتوقع من قتل وتعذيب واهانة .عارف التلامذة اللي عنيهم لسه هتعرف الالوان ملقوش منها غير الابيض والازرق واحمر الاعدام .عندنا دكاتره ومحامين واساتذة ومعيدين ومهندسين وصنايعية وعمال وفلحين ولا الشيوخ ناس مسنة مريضة مابين مريض بالقلب والعجز وكسور لا بيعرف ينام ولا يمشي والتهمة ارهابي .يووه اقولك ايه ولا اية وكله كوم واكل السجن قصدي التعيين ، حاجة يعني قمة القرف حاجة كدا لو قدمتها لقطط السجن تلاقيها زعلت منك وجريت منه وهيا حاسة بالقرف . ولا اعداد السجينات والسجناء اللي من كترهم علشان الواحد منهم يدخل الحمام يستني دوره في طابور طويل وممكن بعد ما يحجز دور من كتر الانتظار ينام ! ولا الزيارة وقهرها ولا العيادة وقرفها ولا التريض اللي مفروض بنتنفس فيه هوا نضيف معظم الوقت بناخده في العنابر وكل دا حمادة واللي جاي اكيد حمادة تاني ! ربنا معانا ومعاكم ومع كل مظلوم.”