اسم السجين (اسم الشهرة) : محمد السيد (ابو داوود)

النوع الاجتماعي : ذكر

تاريخ تحرير أو نشر الرسالة : 6/21/2016

السن وقت الاحتجاز: 30 عام

الوظيفة – نشاط بالمجال العام: طالب بكلية الإعلام وموظف دعم فني بإحدى شركات الإنترنت – عضو بحركة 6 أبريل

مكان احتجاز المرسل : مكان احتجاز غير معلوم

مش كل الرجالة ماتوا في الحرب

مش كل الرجالة ماتوا في الحرب .. الرجالة اللي ماتوا في الحرب دفاعاً عن سينا كتير، بس برده لسه في رجالة كتير عايشين وبيدافعوا عن ارضهم.
النهاردة مجلس الدولة حكم حكمه بوقف اتفاقية ترسيم الحدود وان تيران و صنافير مصرية غصب عن السيسي ونظامه وتأييداً لغضب الشباب . انا محبوس دلوقتي و
بحط صباعي في عين أتخن واحد يقولي انت كنت غلط، ولما أخرج بإذن الله هقول لكل الناس اللي كانت بتعارضني أنتوا كنتوا غلط وأنا و زمايلي كننا صح، وحتى لو مخرجتش أنا برضه فرحان لأن حبستي مجتش هباء، وسواء خرجت أو مخرجتش عايزكم تقولوا لكل الناس أن أحنا صح . قولوا لأحمد موسى زيزو عبده صح وانت غلط .. قولوا لمصطفى بكري مالك عدلي صح وانت غلط .. قولوا لوزير الداخلية عبد الرحمن حمزة صح وانت غلط .. قولوا لوزير العدل سيد البنا صح وانت غلط .. قولوا لوزير السياحة سيد جابر صح وانت غلط .. قولوا لرئيس الوزراء أبو داوود صح وانت غلط .. قولوا للقاضي اللي حكم على الرجالة ب 8 سنين و 5 سنين وسنتين وغرامة 100 الف جنيه، الرجالة دول صح وانت غلط.
قولوا للسيسي رجالة مصر صح، وانت ونظامك غلط