اسم السجين (اسم الشهرة) : محمد صلاح الدين عبد الحليم سلطان (محمد سلطان)

النوع الاجتماعي : ذكر

تاريخ تحرير أو نشر الرسالة : 4/30/2016

السن وقت الاحتجاز: 26 عام

الوظيفة – نشاط بالمجال العام: مدير التطوير المؤسسي بشركة خدمات بترولية سابقا

مكان احتجاز المرسل : مكان احتجاز غير معلوم

إلي المؤلفة قلوبهم بالحق وكره الظلم

إلي المؤلفة قلوبهم بالحق وكره الظلم .. إلي السائرين علي الشوك والجمر ..
إلي من يتعبدون إلي الله بحب الثوره علي عباده الظالمين ..
إلي المتمسكين بطريق الحق رغم ندرة سالكيه .. إلي شعاع النور والأمل في الليالي الحالكه ..
وحشتوني جميعاا ..
“ولابد من يوم مظلوم تترد فيه المظالم” .
صعبان عليا والله لفكم ورايا في الأقسام والمحاكم بس نعمل ايه .. البلد بقت بنت كلب أوي
مش عاوزين حتي يشوفونا مبسوطين وبنضحك .
أنا نفسي أتفرج ع أي ماتش يا جماعه والله .. أي ماتش مش مهم لمين ..نفسي أشوف ملعب وفرق وأجوان واستوديو تحليلي وجماهير .. الحياه ممله جداا من غير كوره .
i have all my life to live ..i have all my love to give ..i will survive
i will survive
جواباتكم يا جماعه هي الحاجه الوحيده اللي بتسليني ..هو الموضوع رخم شويه ليكم أنا عارف بس هي الحاجه الوحيده اللي بنخليني مرتبط بيكم وبحياتكم ..كل أما حد يوحشني بقرا الجواب بتاعه
محمد ناجي اتقبض عليه ..أحا بصراحه.. كأني ناقص خره فوق الخره اللي أنا فيه ..
سلمولي ع ناجي ي جماعه وقولوله :
“وشهدي عطيه اللي اتقتل ظلما وأحب أسافر شرق الدلتا بالبولمان ” Reem Alhwary هتفهم
“ونعوذ بك من غلبة الدين وقهر الرجال”
ولا هيشوفونا مقهورين ولا هيشوفوا عنيا مكسوره رغم كل اللي بشوفه .. وهفضل أضحك ورايق وأتريق عليهم .. وهحرق دمهم برده
وقت ما هتقرو الجواب هيكون برشلونه بيلعب .. وإن شاء الله هنكسب لإن ربنا مش هيرضالي السجن وبرشلونه يخسر الدوري في نفس الوقت .. هيبقي كتير بصراحه
“أخي أنت حر وراء السدود.. أخي أنت حر بتلك القيود ”
أنا نفسي أسمع أي مزيكا وأي أغاني .. كل الأغاني المفضله وتراكات المزيكا وحشتني
كأنهم ولاد الكلب مانعين عننا أي حاجه تربطنا بالحياه ..
أو في رأيي هما أصلا بهايم وميعرفوش قيمة المزيكا
نشيد برشلونه بيقول “سنبقي أقوياء طالما نحن متحدون… tots units fem força
المعركه معركة حياة بين ناس عاوزه تعيش وتنبسط وتغني وتفرح وناس تانيه عاوزين يعيشوا مع اللاسلكي والترحيلات والبوكس والأوامر والكلابشات والذل .
شكراا لكل اللي سأل .. وشكراا لكل اللي كتب .. واتفرجو ع ماتشات برشلونه وع فيلم الكيت كات واسمعوا مزيكا فيلم cinema paradiso .. وهطلعلكم قريب “هو التراك ده طويل ولا التراك طول ” الطحان .