اسم السجين (اسم الشهرة) : محمد مصطفي محمد عرفات (محمد عرفات)
النوع الاجتماعي : ذكر
تاريخ تحرير أو نشر الرسالة : 9/21/2014
السن وقت الاحتجاز: 22 عام
الوظيفة – نشاط بالمجال العام: طالب بكلية الصيدلة بجامعة المنصورة – رئيس اتحاد كلية الصيدلة
مكان احتجاز المرسل : منطقة سجون طرة
اضحك … ربنا موجود
اضحك … ربنا موجود
اضحك ياخويا وعلى صوتك متداريش
اضحك … عرفهم ان الظلم عندك ميساويش
اضحك اوى .. اضحك كمان .. وسمع السجان
صوت ضحكتك بيزلزل الجدران … بيهز عرش الظلم .. اصله جبان
انت فى سجنك ملك وفى قلبك القران
وهو .. فى الدنيا محبوس .. ده السجن مش جدران
واحد حياته كلها خوف … خايف يشوف !
حياته كلها ذل وخضوع … خايف يموت مالجوع !
واحد “حمار” بيتركب وبيتضرب … يتقاله حاااا !
ومن خضوعه وخوفه … حتى مقالش اااه !
مسجون جوى خوفه … مسجون وحجته ظروفه
مسجون وشايف سجنه حرية ! وحريته موته !
اضحك ياخويا وسمع القاضى
اضحك وقوله … كل دا فاضى
حكمك دا حبر على الورق .. والحبر بكرا يطير
واما الورق فهيتحرق
اضحك ياخويا وسمع ال معاك .. اضحك
ولو فيهم حزين … قوله يضحك معاك
وقوله سجنك عباده … وفرجك بايد مولاك
والحق مش هيضيع … والظلم اخره هلاك
اضحك … اضحك ووصل ضحكتك للشمتانين
عرفهم انك فى نعمه … وهما محرومين
حساباتهم كلها دنيا … ولو هتضيع الدين !
السجن فى عرفهم عيبة … وعندك نور ع الجبين
اضحك … اضحك فى كل زيارة
اضحك … وقول لاهلك السجن كفارة
ياكل مظلوم فى الوجود .. اصبر ربنا موجود
محمد عرفات
200 يوم اعتقال 🙂
ولسه .. مكملين .. وبنضحك
