اسم السجين (اسم الشهرة) : محمود مجدي الجوهري

النوع الاجتماعي : ذكر

تاريخ تحرير أو نشر الرسالة : 7/2/2016

السن وقت الاحتجاز: 18 عام

الوظيفة – نشاط بالمجال العام: طالب بالصف الثالث الثانوي

مكان احتجاز المرسل : قسم شرطة طنطا ثان

انا محمود الجوهري

“انا محمود الجوهرى، زميلكم فى دفعة 98، والمفروض أكون معاكم السنة دى فى 3 ثانوى السنة ده. أنا معتقل من 25/2/2015 وبتحاكم عسكرى فى القضية 275، على حاجات كلها متلفقة، ومليش أى علاقة بيها ، وكل ده عشان حبيت اعبر عن رايي فى يوم من الايام. أنا أجلت السنة دى عشان ظروف السجن متسمحش إنى أذاكر، ولا النفسية تسمح بكده، ومستقبلى بيضيع قدامى وأنا محبوس وعاجز. فى تشابه كبير فى الوضع بينى وبينكم، وإن احنا الاتنين الحكومة بتضيع مستقبلنا، بس الفرق بينى وبينكم إن انتو فى ايديكم الإمكانية إنكم تتحركوا وتدوروا على حقكم. أهم حاجة إنك تجرى ورا حقك للأخر ومتزهقش وتكون كلمتكم واحدة وتعرفوا إن “واحد بيفرق فى العدد جدا” . النظام تقريبا اتعود على القمع والقتل والإعتقال حتى مع الطلبة اللى ملهاش دعوة بالسياسة وبيحاولوا يطالبوا بحقهم بس، فحاولوا تضموا على بعض وتخلوا بالكم من بعض .
تقريبا أنا المعتقل الوحيد فى طنطا اللى فى مرحلة الثانوية وأقل من 18 سنة، ورغم إنى مليش محاكمات عسكرية لأن أنا حدث اقل من 18 سنة، إلا إنى بتحاكم عسكرى.
*المهم وإنتوا بتهتفوا وتطالبوا بحقكم متنسوش المحبوسين والمعتقلين اللى كانوا بيطالبوا بحقهم فى يوم من الايام.”