اسم السجين (اسم الشهرة) : نائل حسن

النوع الاجتماعي : ذكر

تاريخ تحرير أو نشر الرسالة : 7/20/2017

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : قسم شرطة الرمل أول

أصدقائي الأعزاء

اصدقائي الاعزاء
وحشتوني جدا جدا جدا
انا مش هقول اسامي علشان ما انساش حد لكن ثقوا اني بسلم على كل واحد وواحدة فيكم سلام حار جدا
انا الحمدلله كويس والامور ماشية فى برج العرب .. هى صحيح لا تخلو من الصعوبات لكن هى زي الحياة عموما.
يمكن مش هتصدقوا انى خايف عليكم اوى وخصوصا بعد الاخبار اللي بسمعها عن اللي بيحصل فى سيناء وعن ارتفاع الاسعار وغلاء المعيشة .. طبعا انا مش عارف رد فعل حزب الكنبة ولسه فى ناس شايفة السيسي خصوصا والعسكر عموما قادرين على ادارة الدولة (اذا كان فى لسه فى دوله)
انا من جوه السجن حاسس ان البلد رايحة للخراب سواء امنيا او اقتصاديا او حتى اجتماعيا .. واحنا لسه بين فرقتين
الفرقة الاولى فرقة منتصرة وهى العسكر وبتحاول تعزز حكمها وتسطو على اى شىء يحقق مصالح افرادها دون النظر لمهمتها الرئيسية وهى حماية الارض والشعب
والفرقة الثانية اللي هى الخاسرة وهى الاخوان واعوانهم ( ودول عايش معاهم فى السجن)
وللاسف هما شمتانين فى اللي بيحصل للناس الغلابة ومتصورين ان ده عقاب اللهي لعدم رضا الناس عن حكمهم.
مش هعرف اكتب اكتر من كده دلوقتي لكن اخيرا عاوز اقول كلمتين
الجيش يحمي ولا يحكم
ومش عاوزين يحكمنا عساكر ولا واحد بالدين بيتاجر
نائل حسن