اسم السجين (اسم الشهرة) : ياسين صبري عبود احمد (ياسين صبري)

النوع الاجتماعي : ذكر

تاريخ تحرير أو نشر الرسالة : 4/29/2016

السن وقت الاحتجاز: غير معلوم

الوظيفة – نشاط بالمجال العام: طالب بكلية التربية بجامعة الأزهر – عضو حزب مصر القوية

مكان احتجاز المرسل : منطقة سجون/تأهيل وادي النطرون

أحمد فؤاد نجم كان عنده حق

أحمد فؤاد نجم كان عنده حق لما قال “مفيش في السجن زمن” ،الزمن في السجن متوقف مش حتي بيتباطأ زي ما بيقول اينشتين في النسبية.
انا غالبا عارف(بس بعمل نفسي مش عارف أو بستعبط) اني هخرج من هنا مشوه نفسياً وروحياً وفكرياً بفعل توقف الزمن ، ولو فكرتوا في الموضوع بشكل “هوليودي” زي افلام الخيال العلمي كده هتلاقوا ان الموضوع مرعب ،ان الزمن يتوقف عند مجموعة من البشر في لحظة ما – بس عندهم بس – ،وخارج الأسوار اللعينة الزمن بيمشي عادي وبتحصل كل يوم الاف التفاصيل .
الأحداث اللي بتخلي الزمن يمشي ،ممكن حاجات تكون تافهة جداً زي الحمام والبوتاجاز والتلاجة والسرير مثلا فقدانها بيأكد فكرة السجن.
أكتر حاجه ممكن السجن يسلبها من أي شخص هي الحرية ،أولاً وأنت في السجن أنت كائن بلا حرية ولا إرادة،لابعيداً بقي عن جو العيال الكيوت أخي انت حر وراء السدود ،أو بتوع انكوا عايشين في سجن كبير.
إن في واحد هو اللي بيقرر هيزود المساحة اللي ممكن أتحرك فيها فيفتح الزنزانة ساعتين تريض،وبعدين يقرر يقلل المساحة تاني فيدخلني الزنزانة تاني.
أن في حد هو اللي يقرر اني هشوفكوا أو هشوف أمي أمتي وفين وقد ايه!
حتي الراديو كرهته بسبب أنهم بيشغلوا الأغاني اللي هما عايزنها مش اللي أنا عايزها!
مفهوم المقاومة أو المقاوحة كان برة المفروض ليه طابع سياسي، أو مرتبط بالمقاومة ضد سياسات النظام ، أنا هنا مفهومي للمقاومة اكثر اتساعاً وتفاهة في نفس الوقت ، المقاومة مع النوم عشان يجي،المقاومة مع الضحكة علشان تخرج، أو المقاومة مع الأفكار الشريرة اللي ممكن تيجي، أو المقاومة مع اليوم اصلاً علشان يعدي … يمكن الفترة دي هي أقبح فترة في السجن ،المشكلة تتلخص في كلمة واحدة (التركيز).
قبل الفترة دي كنت عادي اه حاسس بوجع السجن ووجع السجن أصلا وجع مستمر مش وقتي، بس اليومين دول بقيت بركز في كل حاجه حواليا، وكلها بتزود الأحساس نفسه أحساس الوجع والقهر، يعني أنا بنام عالأرض بقالي اكتر من سنتين بس عمري ما حسيت بالوجع والأهانة زي دلوقتي ،قيسوا بقي علي نومة الأرض كل حاجه تانية … الموضوع بقي صعب قوي وممل.
في الاخر انا كان لازم أكتب الكلام ده علشان ارتاح شوية.