اسم السجين (اسم الشهرة) : احمد ابو ليله

النوع الاجتماعي : ذكر

تاريخ تحرير أو نشر الرسالة : 7/23/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : قسم شرطة طنطا ثان

من داخل سجن 8

ازيك يا د/هالة ؟ أخبار الزنزانة إيه عند حضرتك والخبسة ما بين أربع حيطان والحر والزحمة ؟
يا ترى إيه أخبار الحالة النفسية ؟!
أنا قضيت ف الجو والمكان ده 90يوم من ضمنهم الامتحانات كاملة ورمضان والعيد .
أنا أحمد مصطفى ألوليلة طالب في طب طنطا في الفرقة الرابعه معتقل من يوم 18/4/2016 لحد دلوقتي والله أعلم هطلع وأشوف الشارع امتى تاني !
معايا هنا محمود الجوهري مكملش 18سنة محبوس من 25/2/2015 وبيتحاكم عسكري !
أنا ومحمود من سن ولاد حضرتك ومستقبلنا بيتحطم وبيدمر وانتوا بتطردونا من البلد بالحبسة ده .
عارفة كل ده ليه ؟ عشان حبينا نقول رأينا في النظام الظالم اللي كنتي هتبقي جزأ منه في مجلس الشعب .
النظام اللي أسهل حاجة عنده التلفيق والخبس والظلم عشان يكسرنا ونغير رأينا بس ده مش هيحصل .
أيوة حضرتك سبب في اعتقالي أنا وكل معتقل رأي سياسي .
أنا بكتبلك بعد ما استئنافي اترفض لثالث مرة وبعد سابع تجديد نيابة ب15 يوم والله اعلم هطلع امتى !
أنا بكتبلك الجواب ده عشان حاجتين :
_ارتاح نفسيا
_وعشان تراجعي نفسك وانحيازاتك وتعرفي فين الحق وفين الباطل
أنا مش إخوان ولا حاجة زي ما انتي شايفه بس ده تهمة النظام لأي حد يقول رأيه إنه إخوان مع إنه مش مبرر لحبس حد !
أنا محبوس ظلم والمظلوم دعوته مستجابة وبدعي ربنا كل ليلة على أي حد كان سبب في ظلمي وقهرة أهلي والعجز اللي أنا فيها ده ومستقبلي اللي بيتدمر .
يا ريت تراجعي نفسك عشان متكونيش من ضمن اللي بدعي عليهم .
ربنا يهدي الكل للحق ويفرج عننا الضيقة ويفرج عنك لو كنتي مظلومة .
مش من طبعي الشماتة عشان اتربيت على كده بس أنا بعتبر ده رسالة من ربنا إنه مبينساش حد أيد الظلم فما بالم باللي ظلم !
وسبحان المعز المذل ..
أحمد أبوليلة