اسم السجين (اسم الشهرة) : احمد حسن (استاكوزا)

النوع الاجتماعي : ذكر

تاريخ تحرير أو نشر الرسالة : 6/4/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : منطقة سجون طرة

من الإستاكوزا إلى ولاد اللذينة اللى برا اللي مش محبوسين

من الإستاكوزا إلى ولاد اللذينة اللى برا اللي مش محبوسين 🙁 … – وحشتوني يا جدعان، فشخ والله، وليل نهار بدعي ربنا إنكوا تتحبسوا كلكوا عشان أعرف أقعد معاكوا براحتي .. – أنا كويس جداً والدنيا هنا تمام في كل حاجة، أكل وشرب ونوم ورياضة وكريدت والدنيا كلها تمام، بس ده ميمنعش إني عايز أرّوح يعني!
– عايز اقولكواوالله إني هنا مرتاح اكتر منكوا – كداب قوي -، كل الموضوع إني كنت عايز اَخد credit فالحكومة قررت تساعدني وتديني كريدت، 5 شهور بتديني كريديت! اَه يا أما، ربنا يكرمهم والله من غيرهم كنت ولا 100 سنة عشان اَخد الكريدت ده، حقيقي يعني، المأساة بس إني بحاول اقنعهم إنه تمام كده مش عايز تاني بس هما عندهم الكرم بزيادة، بس معلش، قريب هطلع – كداب قوي- وهنرجع زمن الشقاوة والدنيا هتبقي حلوة… – ال 5 شهور دول حققت فيهم إنجازات عظيمة فعلاً اشهد للسجن إنه كان السبب فيها، يعني مثلاً بقيت مسئول “ميكي” في العنبر، بقيت بعرف أعمل شكشوكة حلو، عملت شكلين جداد لشنبي أول مرة أعملهم، وحاجات تاني كتير، الحمد الله! – بجد بقي، أنا ممتن جدا لكل جدع وجدعة سألو وبيسألوا عليا ومهتمين بالقضية وبالفكرة اللي انا محبوس من أجلها – اللي أنا مش عارف إيه هي!- وعلي رأسهم الحب، مروت، اللي نابها من الكريدت جانب، ولاد اللذينة حبسوا اتنين من أروش تلاتة في مصر!، ما علينا، المهم إني ممتن ليكوا كلكوا، وفعلاً لو ماكنتوش موجودين جنبي الفترة دي وبتساندوني وبتاَزوني مكانش هيفرق معايا في حاجة وكنت هكمل عادي، عشان أنا جامد جداً ! 😀 بهزر .. – مش همسي عليكوا واحد واحد بالأسم عشان منساش حد، بس مسولي علي مجالكوا كلكوا، وادعولي في كل صلاة، وبين كل صلاة وإقامة، وفي كل سجدة وبعد كل صلاة، وقبل ما تناموا وبردو مش هخرج! حاجة بنت جزمة بجد! – يلا، خليكوا كويسين لحد ما تتحبسوا، سلام..” الفقير الي الله إستاكوزا سجن طرة تحقيقعنبر “3”، زنزانة “1/1″ المصلب اللي جنب الحمام
4/6/2016”