اسم السجين (اسم الشهرة) : احمد رزق حسين حسين – عمرو محمد احمد زهران – احمد محمد عبد الله الصفطي – ضياء احمد عبد الرحمن ابو العنين – ايهاب محمد علي الجندي – محمد طه محمود – تامر خميس جمعه صباح – محمد السعيد عبده راجح – محمد السيد عبد الغني نجم – احمد محمد احمد علي

النوع الاجتماعي : ذكر

تاريخ تحرير أو نشر الرسالة : 6/25/2016

السن وقت الاحتجاز: –

الوظيفة – نشاط بالمجال العام: –

مكان احتجاز المرسل : منطقة سجون طرة

ننتحر لكم؟!

ننتحر لكم ؟! لانعتقد ان السؤال ده هيفرق مع حد خصوصا فى زحمة المسلسلات الرمضانية .. لكن عموما فى قضية مشهورة باسم اعتصام رابعة ورقمها 2985 لسنة 2015 كلى شرق القاهرة, القضية دى لسه محبوس بسببها ابرياء عشرة ما اتورطوش فى اى مخالفة للقانون,ماكانوش بينظموا الاعتصام او باقامة دولة ومؤسساتها.ولسه محبوسين للسنة الثالثة على ذمة القضية مع 350متهم,من ضمنهم عدد بسيط لاعلاقة لهم بالاخوان واتباعهم وافكارهم,احنا العشرة ماكناش نعرف بعضنا قبل الحبس ولانعرف حد من باقى المتهمين معانا. احنا العشرة المالناش ضهر والا كنا اخدنا اخلاء سبيل مع مئات من اللى خرجوا فى اول سنة حبس واغلبهم اخوان اوتكفيريين . احنا العشرة لسه محبوسين فى استقبال طره,رغم ان ضباط الجهات السيادية ال حققوا معانا اكدوا على ان التحريات الامنية كلها بتؤكد براءتنا من اى تورط فى عنف او انتماء لجماعة او فكر متطرف. لكن احنا العشرة لسه محبوسين للشهر ال 35 على التوالى .. رغم ان المحامى المتطوع معانا اكد على ان ورق القضية يؤكد لام الضباط ال حققوا معانا,ولكن احنا العشرة بنتعاقب مع اهلنا واحبابنا على جريمة الكل عارف اننا ماعملنهاش .. احنا العشرة لسه جوا الزنازين لثالث رمضان على التوالى .. احنا العشرة محرومين من فرحة العيد مع اهلنا للعيد الثالث على التوالى .. لسه مش قادرين نفهم ليه المستشار حسن فريد ما يديناش اخلاء سبيل,ولا احنا اخطر من ال 400 الاخدوا اخلاء سبيل فى اول سنة على ذمة القضية؟! احنا العشرة لانشكل خطرا على المحكمة او الادلة او الشهود ,وبالتأكيد لانشكل خطرا على مصر الدولة او مصر الشعب او مصر الارض .. ليه لسه محبوسين مع ناس قيادتهم بتستغل الجلسات لاغراض سياسية و اعلامية؟! ليه لسه محبوسين مع ال سمعنا قياداتهم بيطلبوا من المحامين بتوعهم اطالة وقت المحاكمة تضييع وقت كل جلسة؟! ليه لسه محبوسين مع ال بيهربوا منجلسة النطق بالحكم ,لان المحامين بتوعهم اكدوا ليهم ضعف موقفهم القانونى فى القضية وانعدام فرص البراءة والاحكام المخففة فى هذه الجلسة التى تبعد اكثر بسبب مماطلتهم؟! ليه احنا العشرة مانتمتعش بحق الحرية رغم اننا لا نتبع قناة قطر اللى خرج مراسلها من سنتان واحنا لأ؟ ليه احنا العشرة _اللى قاومنا محاولات واغراءات ضمنا لاى جماعة او فكر متطرف داخل السجن_ نفضل محبوسين وسط الضغوط دى كلها؟! ليه احنا العشرة مانفذتوش معانا وعود رئيس الجمهورية بخروج غير المتورطين فى عنف او مخالفة للقانون,ليه الوعود دى ما اتطبقتش علينا رغم تكرارها من سنة ونص؟ ليه احنا العشرة المالناش فيه نتحبس 3 سنين مع ناس تقدس وتسير بدون تفكير وراء كتب ارشادهم او وراء مستر اكس الجديد الاسمه ابوبكر البغدادى؟ ليه مافيش اى فرصة للاستفادة بحد ادنى من العدالة من القضاة او النيابة او اى مؤسسة,وعدالة تسمح بوقف السحب على المكشوف من ارصدتنا المحدودة فى بنك الحياة؟! ليه مافيش انسان واحد فى الدولة المصرية حاطط اولوية تصحيح خطأ وجود غيرالمتورطين من امثالنا داخل الزنازين؟ احنا العشرة محبوسين 3 سنين,يعنى مش خطأ او هفوة واحدة, ده تراكم اخطاء ..فهل التراكم ده غير قابل للتوقف قبل فوات الآوان؟ ليه احنا العشرة الركبونا يوم 14-8-2013 عربيات الترحيلات كنوع من كمالة العدد,ليه الكماله لسه محبوسين ,واغلب العدد خرج من سنتان او اكثر بالتلاعبات القانونية والورق المضروب؟ ليه احنا العشرة نبقى مجبرين على اننا مانطمعش فى امل العدالة والحرية وتطبيق القانون الا لو وصلنا لحافة الهاوية والاشراف على الموت,وساعتها فى احتمال معقول اننا نلحق فرصة الافراج الصحى؟! ليه احنا العشرة الواقع بتاعنا كشف الخيال اللى فى فيلم “احنا بتوع الاتوبيس”؟ ليه احنا العشرة الممسوكين بالغلط مش شايفين اى محاولة لتصحيح الغلط؟ ليه بقينا بنفكر كتير فى الانتحار؟ ليه ماحدش عنده رد؟!