اسم السجين (اسم الشهرة) : احمد سعيد

النوع الاجتماعي : ذكر

تاريخ تحرير أو نشر الرسالة : 9/14/2016

السن وقت الاحتجاز: غير معلوم

الوظيفة – نشاط بالمجال العام: طبيب

مكان احتجاز المرسل : منطقة سجون طرة

قولوا لمودي اني بغنيلة ” رايح اجيب الديب من ديلة “

قولوا لمودي اني بغنيلة ” رايح اجيب الديب من ديلة ”
بس الديب مكار متنكر و عشان كده يمكن اتاخر
و قولوله لو كنت وحشتة.. بابا يا مودي ماينساش وعده
و هانت خالص بكرة هاجيلة.. بس اجيب الديب من ديله
بابا حبيبك زيك شاطر… قابل وسط طريقة عساكر
قبضوا عليه علشان بيفكر… و مقالش لاوامرهم حاضر
حاول يشرحلهم الفكرة.. ولا فهموه ولا فهموا دليله
مودي يا صاحبي يا شاطر فاكر.. لما مكنتش راضي تذاكر
مش كنت بقولك من حقك.. بس ناقشني و سيبني اناقشك
اهو دول كانوا عايزني اسلم.. مش عايزين ارفض و اتكلم
و دا حقي ماينفعش اسيبه.. زي ما مودي البطل اتعلم
و باباه كان دايما يحكيلة
قولوا لمودي باباك بيحبك… لو بايديه كان يفضل جنبك
بس الديب جاهل مسعور.. و بياكل في الناس بالدور
لازم حد يواجهه ضروري… قبل ما كل الناس تطاطيله
ف روحت اجيب الديب من ديلة