اسم السجين (اسم الشهرة) : احمد ماهر ابراهيم الطنطاوي (احمد ماهر)

النوع الاجتماعي : ذكر

تاريخ تحرير أو نشر الرسالة : 2/19/2014

السن وقت الاحتجاز: 35 عام

الوظيفة – نشاط بالمجال العام: مهندس – مؤسس حركة 6 أبريل

مكان احتجاز المرسل : منطقة سجون طرة

فكرة عبقرية .. اعمل مفوضية

فكرة عبقرية .. اعمل مفوضية مفوضية للشباب … يا دماغك العالية، أيوه بقى رجعنا للخمسينات والستينات وأيام الاتحاد الاشتراكي والتنظيم الطليعي والأيام الحلوة دي، كفاية فوضى تنظيمات شبابية بقى، واحنا في حالة حرب مع سكان كوكب المريخ ولا صوت يعلوا فوق صوت المعركة، مفيش حاجة اسمها تعدد وتنوع ورأي ورأي آخر .. هو صوت واحد بس، صوت النظام اللي عارف مصلحة الشعب و مصلحة الشباب. أيوه بقى مفوضية الشباب ومفرخة للكوادر ويطلعلنا ناس عباقرة وجهابذة زي مفيد شهاب وكمال الشاذلي الله يرحمه وصفوت الشريف وزكريا عزمي وفتحي سرور والناس الحلوة اللي ماتتعوضش دي. العباقرة دول تربية الدولة والاتحاد الاشتراكي والتنظيم الطليعي وكانوا مع الدولة في كل تحولاتها، اشتراكية قومية شغال، إنفتاح شغال، ديمقراطية شكلية ماشي … ناس لكل العصور، عايزين بقى نعمل نسخة 2014. مفوضية الشباب … فكرة عبقرية من عمكم حجازي، ليه نخلي فيه أصوات مزعجة، جمع كل المتنطعين وكل اللي من عينة عبده مشتاق وجمعهم في حظيرة واحده واقفل عليهم وخلي المفتاح مع السلطة، اللي يسمع الكلام يبقى شباب الثورة الطاهر ويدخل المفوضية، واللي يعمل دوشة للسلطة اطرده من رحمتك. نخبة جديدة لطيفة لذيذة واقفة في صف السلطة يعني الصف الوطني وممكن علشان الموضوع يبقى مسبوك أكتر نخلي شوية معارضة جوه المفوضية زي المنابر بتاعة زمان كده، بس معارضة بأدب .. بأخلاق .. معارضة شبابية بتسمع الكلام ولكن مالهاش دعوة بحاجة اسمها حقوق انسان. فكرة عبقرية .. اعمل مفوضية .. الاشتراكيين الثوريين مزعلينك وعاملين دوشة وبيتكلموا عن العدالة الاجتماعية و الحقوق؟؟ سهلة أعمل اشتراكيين في المفوضية واختار كام اسم اشتراكي لطيف وحطهم في المفوضية وخليهم يبرروا اجراءات السلطة ويقولوا انها عادلة وزي الفل. 6 ابريل عاملين دوشة وازاعاج وبيتكلموا عن الحريات وحقوق الانسان؟؟ سهلة هات واحد نصاب وحفظه كلمتين عن تمويل 6 ابريل الأصلية وخليه يعمل نصباية اسمها حزب تحت التأسيس ودخله المفوضية ويبقى من الشباب الطاهر اللي رفض يبقى خاين وعميل زي 6 ابريل المزعجين. جمع الشباب من اللي بيجوا أول ما تندهلهم وبيفرحوا بأي حاجة ترميها لهم ونفسهم في أي منصب وأعمل بيهم المفوضية وقول هم دول شباب الثورة الطاهر لكن اللي مش في المفوضية مش شباب الثورة الطاهر. وبكده يطلع جيل جديد لا يعادي السلطة مهما استبدت أو سرقت أو قتلت وبكده يبقى عندنا نخبة شبابية جديده ونقضي على المزعجين خالص ونحرقهم ونمسحهم مسح وننسف تاريخهم وكل اللي عملوه. مؤسسة الرئاسة هي اللي معاها ختم الوطنية ومعاها ختم شباب الثورة الطاهر وبالتالي الشباب الطاهر الوطني هو اللي هايدخل المفوضية والشباب اللي مش طاهر ومش وطني مش هايدخل المفوضية، ولو مش طاهر قوي وبيعمل مشاكل ودوشة وبيتكلم استغفر الله العظيم عن حقوق انسان او عدالة او حريات ا كرامة فده بقى هايدخل السجن. وهيتم مسحه من الوجود وهايتم حرقه زي ما قال عمو الظابط وكل موفضية وانتو طيبين أحمد ماهر ليمان طره 19-2-2014