اسم السجين (اسم الشهرة) : احمد ماهر ابراهيم الطنطاوي (احمد ماهر)

النوع الاجتماعي : ذكر

تاريخ تحرير أو نشر الرسالة : 1/12/2014

السن وقت الاحتجاز: 35 عام

الوظيفة – نشاط بالمجال العام: مهندس – مؤسس حركة 6 أبريل

مكان احتجاز المرسل : منطقة سجون طرة

99.9999% .. 25 يناير

99.9999% .. 25 يناير مش مهتم قوي بالإستفتاء , زيه زي 2005 و 2007 و 2011 و 2012 . لأ .. ده هيبقى زي إستفتاءات الستينات والسبعينات أيام 99.99% نعم ، أيام الزعيم الملهم . نفس النظام العسكري بيحكمنا تاني ، بس الفرق إن دلوقتي نظام ناصري عسكري من بتوع شمس بدران وصلاح نصر ، لا فيه كاريزما , ولا زعامة , ولا إصلاح زراعي , ولا عدالة إجتماعية . الدولة الناصرية العسكرية نموذج صلاح نصر بتعديلات 2014 , دولة ناصرية بتأخد معونات عسكرية من أمريكا ولا تعادي إسرائيل , بل وتنسق معاها , وبالتالي ف الإستفتاء غير مهم . وهتلاقي إن نفس النظام اللي بيروج له هو أول من يخالفه و مواد الحريات هتبقى حبر على ورق ، والداخلية هتكثف الإنتهاكات ومخالفة القانون والدستور زي ماكان بيحصل زمان .. عادي بقى . الأهم دلوقتي هو 25 يناير 2014 . لا أظن إنه هيبقى ثورة جديده ، ولكن لازم ننزل . أنا أكيد مش هعرف أنزل المرة دي علشان السجن وكده ولكن لازم نزول ، أصل فضل إيه من الثورة ؟؟!!! إتضحك علينا في 30 يونيو ، و إنقلبوا علينا في 3 يوليو . لأ … إحنا إنضحك علينا و إتنصب علينا من أول 11 فبراير 2011 ، لما ضحكوا علينا وقالوا المجلس حمى الثورة في نفس الوقت اللي كان السيسي بيتجسس على شباب الثورة ، وبعضهم إتعذب في المخابرات الحربية أيام الثورة ، وضحكوا علينا وحافظوا على نظام مبارك ومصالحهم وكل أركان النظام من شبكات فساد و إعلام فاسد وقضاء فاجر . هننزل نفكر الناس بالثورة اللي إنضحك عليها ، نقولهم معلش ضحكوا علينا في 11 فبراير وفي 3 يوليو ، وهما اللي حكموا في المرتين ولبسونا في الحيط . إنزل علشان تفكرهم إن في جيل مش هيستسلم ولا هينسى ثورته . إنزل علشان تطالب بنفس مطالب 2011 .. عيش .. حرية .. عدالة إجتماعية .. كرامة إنسانية . ضحكوا علينا .. سواء العسكر أو الإخوان , و الإخوان وزرهم أكبر , علشان نصحناهم كتير و إدينالهم فرص كتير , لكن طمعوا كتير . إنزل قول إن الثورة مش هتموت ، ونحن لنظام مبارك بالمرصاد . إحبسونا و إقتلونا ومش هننسى 25 يناير . شوهونا وشوهوا ثورتنا لكن برضه هتفضل هي الأمل . إنزل طالب بحقك , قول مش هنخاف من القمع و الإعتقال والتعذيب ، الدنيا إتغيرت .. والسيسي صلاح نصر مش هيأكل معانا . إنزل برضه قول للإخوان راجعوا نفسكم .. و إعترفوا بأخطائكم وقت السلطة ، لازم مراجعات جادة في المنهج و أساسيات كتير ، ولازم حوار داخلي و رصد للأخطاء والتفكير في تجنبها مستقبلاً . أصل المستقبل جاي جاي ، والنظام العسكري القمعي هيغور مهما طال الوقت ، فلازم تراجعوا نفسكوا و أساليبكم وخطابكم و أفكاركم علشان ميتعملش معاكم اللي إتعمل فيكم قبل كده . أه إنضحك علينا في 3 يوليو , لكن الناس بجد خرجت ضدكم في 30 يونيو ، أه العسكر والفلول ساعدوا , لكن برضه أخطائكم كانت كارثية وفادحة . علشان كده لازم الناس تفتكر ثورة 25 يناير , والقيم بتاعتها ومطالبها . الشعب يريد إسقاط النظام الذي لم يسقط بعد . عيش .. حرية .. عدالة إجتماعية .. كرامة إنسانية . أحمد ماهر ليمان طرة 12-1-2014