اسم السجين (اسم الشهرة) : اسلام الحضري

النوع الاجتماعي : ذكر

تاريخ تحرير أو نشر الرسالة : 6/5/2017

السن وقت الاحتجاز: غير معلوم

الوظيفة – نشاط بالمجال العام: صاحب شركة – مؤسس حركة 6 أبريل

مكان احتجاز المرسل : قسم شرطة الرمل أول

النهاردة كملت شهر في الحبس

ازيكم
عاملين ايه ؟
النهاردة كملت شهر في الحبس
كل شهر وانتم الصوت ساعة ما يحبوا الدنيا سكوت
في رسالتي دي مش هتكلم عن السجن والحبسة ولا الأمل والأحلام
عايز افتح معاكم واحد من أهم ألبومات صوري اللي تستحق اتفشخر بيها قدامكم
ألبوم الصور اللي بيجمعني بالجدع مصطفى الشيخ
-صورة في يناير في الميدان واحنا حالفين نكمل
-صورة فيها بنضحك ودموع الغاز في عينينا
-صورةبهتف وراه وهتافه بيرج القائد ابراهيم
-صورة في مسيرة.. صورة في مظاهرة … صورة في جنازة
-صورة في اجتماع بنفكر في فكرة
-صورة واحنا شايلين هم بكرة
-صورة وانا واقف مستنيه ينزل من عربية الترحيلات
-صورة وهو واقف معايا وانا في ايدي الكلبشات
صاحبي الجدع مصطفى الشيخ
المفروض اني لما مسكت الورقة والقلم كنت عايز قال ايه اكتب رسالة تضامن معاك قبل الجلسة بتاعتك وكدا واقولك اجمد وانت قدها والسجن للجدعان بس يا صاحبي السجن مش لينا وربنا يعدي المحنة دي ومتشوفش حيطان السجن من جوة تاني
احنا كنا عارفين يوم ما قررنا ما نمشيش جنب الحيط ان فيه تمن هيتدفع وفيه ناس دفعته دم وناس بتدفعه عمر واحنا هندفع واحنا راضيين ورافعين راسنا وهتفضل اجابتنا على سؤال مين اللي يقدر ساعة يحبس مصر ؟ هي … ولا حد
إسلام الحضري
5/6/2017