اسم السجين (اسم الشهرة) : اسماء حمدي عبد الستار السيد (اسماء حمدي)
النوع الاجتماعي : أنثى
تاريخ تحرير أو نشر الرسالة : 11/1/2016
السن وقت الاحتجاز: 21 عام
الوظيفة – نشاط بالمجال العام: طالبة بكلية طب الأسنان بجامعة الأزهر
مكان احتجاز المرسل : سجن دمنهور العمومي (الأبعادية)
النور أشرق في الوجود جميل
النور أشرق في الوجود جميل ..
والصبح للكسب الحلال سبيل ..
يسعي العباد اذا اهل بنوره ..
للرزق في أمن به موصول ..
ريحة البيض المقلي من إيد ماما وأوقات أكتر من إيد الحاج، أتوبيس الحكومة بتاع القنايات والكمسري اللي كان ماركة مسجله بشوفه كل يوم طول أيام الدراسة. معهد فتايات الأزهر في موقف المنصورة، والتواشيح اللي بسمعها وبعرف انو الساعة ٦، صحيان بدري الاجباري عشان نلحق الاتوبيس، وقميصي الزهري والجيبه التنيات الكحلي اللي ماما مفصلهالي علي ايديها!
طريق العودة اللي كان ساعات بيبقي بعجلة بابا ويوم لما وقعت من وراه وبنطلون الترنج الأبيض اللي بيلمع اتقطع من علي ركبتي واتعورت .. وساعات مع عمو صبحي وبنات خالتي – اخواتي اللي امي مجابتهمش من رحمها – والايس كريم اللي جبهولنا وروحنا مشي من وسط الغيطان .. ومرات أكتر كان من الميكروباصات الشنيعة من موقف المنصوره وأما كنا بنخبي أشرقت تحت الكرسي عشان ندفع أجره أقل .. ولا كفر عطالله اللي كنت بمتحن فيها بس أولي إبتدائي عشان أدخل وعندي ٥ سنين بدل ٦ وبابا اللي كان بيوديني هوا الإمتحانات ونكب من القنطرة ويفضل مستنيني لحد ما أخلص الامتحان، المُدرسة اللي سمعت منها لاول مره كلمه “سَجَرة” وفضلت فاكراها لحد دلوقتي، سارة أسامة اللي افتكرتني أما روحنا سوا الاعدادية في معهد المبره وقالتلي انت البنت اللي باباك كان بييجي يوصلك .
يا تري يابا كنت عارف ان كل اللي عملته ده اما دخلتني المعهد بدري عشان أخلص تعليم بدري كان هيضيع هدر في سجون بلدنا .. السنه التالته علي التوالي من غير امتحانات ولا أمل. طب كونك أصلا اخترت اني أبقي في معهد أزهري عشان أدرس القرآن والسيرة وأبقي في حرم الجمال والحق والعدل والعزة وأول ما أشوف الذل والقهر والظلم اني يتم اعتقالي من جوه ذات الحرم ده، بس هوا الحرم الأزهري ايه وحرم أي جامعة مصرية تانيه ايه ؟!
كل الحرمات بيتم انتهاكها دلوقتي بدوافع باطله يراد بها حق ويسرا الخطيب رفيقة المعتقل اللي اتاخدت من حرم جامعة المنصورة ولفقولها قضيتين كل قضية ب٣ سنين، بدما خدت براءه في احداهم وقلنا يمكن حد ضميره صحي وهيبقي ٣ سنين وبس قال ايه سيادة النائب العام مش عاوز يمضي علي ضم وخصم القضيتين عشان تخرج ١٢ نوفمبر الجي ياعني بعد ١٢ يوم وإنما تقضي ٣ سنين من بعد البراءه يعني تقضي ٥ سنين في السجن ظلما وعدوانا.
خلو عند دين ضمايركو دم عشان نار حساب ظلمكم متبقاش ألف ألف نار ..
سنن الحياة معروفة وزي ما بتعمل هيتعمل فيك وفأعز ماليك ..
والزمن يشهد.
١نوفمبر ٢٠١٦
أسماء مصر
أبعدية اللعنات
