اسم السجين (اسم الشهرة) : جعفر ابراهيم الزعفراني (جعفر الزعفراني)

النوع الاجتماعي : ذكر

تاريخ تحرير أو نشر الرسالة : 9/22/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : منطقة سجون طرة

انهاردة عيد ميلاد بندقة 3 سنين

انهاردة عيد ميلاد بندقة 3 سنين
كل سنة وانتي طيبة يا آمنة
ربنا ينبتك نبات صالح و يعني علي بري بك و يرزقني برك
رسالة للمستقبل
عارف ان ده ثالث عيد ميلاد ليكي اغيب عنه لكن عايزك تعرفي لما تكبري و تقرأي الكلام ده انه مش بأيدي صحيح هما وقتها كانو بيضحكوا عليكي ويقولولك بابا في الشغل لكن الحقيقة يا آمنة ان بابا كان معتقل مقيد الحرية في بلده عشان حاول يعملها اي حاجة لما لقاها بتتسرق …
ولما تقرأي عن الفترة الي بابا كان فيها في السجن هتعرفي انها اسوء فترة مرت علي البلد قهر و ظلم و استعباد و فقر و جهل و استحمار و تعذيب وقتل في الشوارع والبيوت والاقسام …
هتعرفي ان في الوقت ده الجيش الي مفروض بيحمي البلد و هتكوني درستي اكيد في المناهج انتصارات اكتوبر ، في الوقت ده جات قيادات مرمغت بكرامته الارض خلته ينزل ينضف الشوارع و يبيع خضار و لحمة ولبن واستغلوا سطوتهم وان البلد كلها في ايديهم و استحوزوا علي كل القطاعات الاقتصادية في البلد ، وفرطوا في ارض من ارضنا الي المفروض بيحموها …
طبعا مش هحتاج احكيلك عن العرص _ اكيد مش هتبأ شتيمة علي ايامك _ لان الي هتشوفيه منه غني عن القول ..
اعرفي وقتها يا حبيبتي انك كل شوية كنتي بتوجعي قلب ماما لما تشوفي صحبتك في الحضانة او حد من الاطفال الي بتلعبي معاهم في اي حته و باباهم بيلعب معاهم كنتي بتقعدي تسهمي و تقولي انا عايزة زي ده او عايزة بابا زيهم اعرفي يا حبيبتي ان ماما ملهاش ذنب في ده ولما تكبري هتعرفي ان في اطفال زيك اتحرموا من باباهم بس علي طول اكيد وقتها هتفهمي يعني ايه استشهاد دول برضو ملهمش ذنب
ده كان قدرهم و ده كان قدري في الوقت ده زي ما كان قدرك انك تتولدي في حظر تجول و نتعطل في الكمائن الي في كل حتة واحنا بنجري علي المستشفي عشان تيجي علي وش الدنيا تلاقي وضع بلدك بالشكل ده .
بس اعرفي كمان ان بابا و جيله ما سكتوش غير لما طهروا البلد من الي كارهينه و اثبتوا انهم ينفع يجمعهم علي اختلاف توجهاتهم مشروع واحد لبناء وطن و حاربوا لغاية لما رجعوا الناس تعرف تعيش مع بعضها من تاني و صاغوا مستقبل فضلوا يحلموا بيه طول عمرهم عشان تعيشي انت و جيلك في وطن حر و كرامتك محفوظة فيه و فخورة بانتمائك ليه …