اسم السجين (اسم الشهرة) : جلال عبد الفتاح البحيري (جلال البحيري)
النوع الاجتماعي : ذكر
تاريخ تحرير أو نشر الرسالة : 3/5/2023
السن وقت الاحتجاز: 28 عام
الوظيفة – نشاط بالمجال العام: شاعر
مكان احتجاز المرسل : منطقة سجون بدر
خمس سنين عدوا بالتمام والكمال
بسم الله الرحمن الرحيم
الأحد 5 مارس 2023
خمس سنين عدوا بالتمام والكمال.. خمس سنين لو حاولنا نفكهم ح يعملوا تقريباً 1800 يوم وشويه ايام فكه .
يمكن يكون الرقم ده شكله عادي وسط الارقام.. لكنه لما يتحول لاوراق بتسقط من شجر عمرك.. يبقي رقم ابليس ومُخيف .
كنت اعرف ان زمان اللي كان بيتسرق منه محفظة أو عربية بيروح لأقرب قسم شرطه ويمكن يساعدوه .. لكني ماعرفش اللي بيتسرق منه عُمره يروح لمين ومين يساعده!!
مفهوم الوطنية اللي اتربينا عليه إنه كيان رَحب ومدهش ومعجز.. ليه الكيان الرحب يتم اختزاله لمساحة متر في زنزانة في سجن.. وليه هذا الكيان المدهش يتحول لمسخ مرعب دوره الأسمي هو نسف اعمار اولاده وتدمير كل شيء انساني وجميل فيهم.. اعتقد إني واحد من ابناء هذي الارض واعتقد إن فيه أدوار أهم بكتير من إني انا وكل اللي زيي.. اللي ايادينا ماعرفتش طريق الدم ولا عقولنا عرفت طريق التطرف.. ندبل و نشيخ ورا القضبان.
النهارده بيبدأ عامي السادس من عُمر مهدور في السجون.. وورايا تهم كتير مخجله.. ادناها الكذب واقصاها الإرهاب.. تهم كتير لم ارتكب منها إلا جريمه واحده هي “الشعر”..
شعر ناضج.. شعر ساذج.. شعر مثالي او مراهق.. اسمه شعر.
والنهارده اختارت إني امارس حقي الدستوري والآدمي في الاعتراض علي هذا الوضع الغير آدمي بالاضراب مبدئياً عن الطعام دون الشراب وعن علاج القلب و اقراص الاكتئاب وتدريجياً بالامتناع حتي عن الشراب.
و ح يستمر الإضراب لحد ما أسترد حريتي بالخروج حي او مش حي.
جلال البحيري
سجن بدر ١
زنزانه ٢/٥٥
قطاع ٤
الاحد مارس ٢٠٢٣
