اسم السجين (اسم الشهرة) : زياد عبد الحميد العليمي (زياد العليمي)

النوع الاجتماعي : ذكر

تاريخ تحرير أو نشر الرسالة : 11/18/2021

السن وقت الاحتجاز: غير معلوم

الوظيفة – نشاط بالمجال العام: برلماني سابق

مكان احتجاز المرسل : منطقة سجون طرة

فرصة سعيدة يا جماعة

حبيبتي ماما
وحشاني جدا، اكتر بكتير من اللي تشيله الكلمة دي. ما تتخيليش قد ايه مشغول بيكي ومشغول عليكي طول الوقت. طبعا انا عرفت الحكم يومها، وما تقلقيش عليا خالص. انا كويس، ووقت ما كنتم متفائلين انا كنت باقول لكم أنا عارف أنا داخل على ايه وراضي بيه، وأظن حضرتك عارفة كويس تربيتك تطلع رجالة عاملين ازاي، وأظن كمان ان حضرتك عارفة ان كل حاجة بإيد ربنا وكل اللي ربنا بيختاره لنا خير، حتى لو مش شايفينه كويس، فأكيد فيه خير حنعرفه في يوم من الأيام.
………
سلمي لي على كل اصحابي، وقولي لهم انا انبسطت جدا بالقضية لانها خلتني اشوفهم “فرصة سعيدة يا جماعة وقدمكم خضرا والله ” (السمايلينح فيس دا زياد راسمه في الجواب!) بجد سلمي عليهم كتير واشكريهم واحد واحد وقولي لهم اني انبسطت بجد وممتن جدا لكل واحد تعب نفسه وجه عشان اشوفه ان شالله ثواني من بعيد، وده فرق معايا جدا، واشكري المحامين كلهم، وقولي لهم انهم عملوا اللي عليهم وزيادة، والباقي بقى احنا عارفين انه مالوش علاقة لا بالورق ولا القانون.. شكرا على كل حاجة وربنا يعوض حضرتك عن كل التعب اللي تعبته لكم معايا
كل الحب اللي في الدنيا ❤️ زياد