اسم السجين (اسم الشهرة) : ساره محمد علي ابراهيم (ساره رمضان)

النوع الاجتماعي : أنثى

تاريخ تحرير أو نشر الرسالة : 6/5/2015

السن وقت الاحتجاز: 21 عام

الوظيفة – نشاط بالمجال العام: طالبة

مكان احتجاز المرسل : سجن بورسعيد العمومي

يوم الأربع ده كان من أصعب الأيام

يوم الأربع ده كان من أصعب الأيام .. عدينا على شوارع كنا بنمشي فيها بحرية.. يومها بقا ماكناش بحرية.. يومها كنا متكلبشين.. و في عربية الترحيلات.. يادوب كنا بنبص من النضارة.. الشباك اللي حوالي 3 سم.. عالشوارع اللي وحشانا,, يمكن نشوف بالصدفة حد واحشنا
– يوم 5/6/2015 هيكون عدى شهر على الاعتقال.. تعرفي والله ما حسيت بالأيام.. سبحان الله.. ربنا بيبعت الابتلاء بيبعتلك معاه الصبر والثبات.. ويربط على قلبك.. ربنا أحن علينا من أي حد.. اللهم لك الحمد
– أكتر سؤال بفكر فيه يا ترى رمضان هييجي علينا واحنا جوه؟ طب والعيد؟ وفرحة العيد.. عايزة أقضيها يا برا يا مع عمر (أخوها المعتقل) .. بس شكل لسه بدري.. مش تشاؤم.. بس دا الواقع
– عارفه كنت دايما بقول نفسي يبقى عيد ميلادي السنه دي مختلف.. بس والله كان نفسي أكون عند ربنا.. قمت اتاخدت 5/5/2015 و عيد ميلادي كان يوم 8/5/2015
– أكتر آية كانت بتيجي في بالي الفترة الأخيرة لما سيدنا يوسف قال يا رب السجن أحب إلىَ مما يدعونني إليه.. كنت بقول السجن أحب إلى من قعدتي في البيت و عجزي.. وكأنني صدقت الله حينها..
– الحمد لله على كل حاجه الحمد لله الحمد لله.. الحمد لله في الألم والفرح.. في الابتلاء والقدر
– أنا مش قادرة أكتب خاطرة لحد الوقتي من يوم ما اتمسكت 5/5/2015 كأن كل الكلام اتحجر.. كأن كل العبارات اتوقفت
– الموقف فوق ما أي حد يتخيل.. اللهم لك الحمد.. المهم اننا بخير
– عارفه.. جوايا كتير بس ساعات الكتير ده بيتلاشى وبيكون ولا حاجه
– أحلى حاجه انك متفكريش ولا تكتئبي.. إلهي نفسك.. إشغلي بالك
– اوعو تزعلو أو تيأسوا
– احنا ثباتكم و صمودكم بيقوينا
– عذرا بس احنا هنفضل شوية لحد ما نتغير.. احنا مقصرين مع ربنا.. مش شرط الاصطفاء يكون احسن ناس.. ممكن بسبب ذنوبنا.. اللهم اغفر لنا.. المهم اننا مش زعلانين و راضيين والله كل الرضى.. وبنضحك وبنهزر
– مش عايزاكي تقولي كلمة عجز تاني.. أصل والله ما فيه عجز طول ما ربنا موجود.. احنا أقوياء بالله.. حين نبتعد عنه فقط حينها يكون العجز.. هذا ما تعلمته أول يوم من شدة ما رأينا.. يأتي فرج الله.. ثم تضييق.. و حين يعلم الله ألمنا يأتي الفرج