اسم السجين (اسم الشهرة) : شريف فرج ابراهيم حسن (شريف فرج)

النوع الاجتماعي : ذكر

تاريخ تحرير أو نشر الرسالة : 6/26/2014

السن وقت الاحتجاز: 31 عام

الوظيفة – نشاط بالمجال العام: عضو هيئة تدريس ومدرس مساعد بكلية الفنون الجميلة بجامعة الإسكندرية – عضو مؤسس في مبادرة “أنقذوا الإسكندرية”

مكان احتجاز المرسل : سجن الحضرة العمومي

عايز تعرف يعنى ايه السجن ؟

عايز تعرف يعنى ايه السجن ؟ الموضوع بسيط … اقلع كل هدومك والبس كل اللبس الأبيض اللى عندك (لو معندكش اشترى) – ادخل اوضة نومك، اقفل بابك .. ارمى موبايلك والتليفزيون والكمبيوتر والانترنت والـmp3 والراديو، شيل الدواليب والبراويز والسرير والكومود وأى حتة خشب طلعها بره .. اقفل شباكك (سيب فتحة متعرفش توصلها لو نطيت) وحط عليه حديد .. تمام ؟ جهزت المكان ؟؟ لا .. لسه شوية بص لكورنر الاوضة تخيل حفرة، وحنفية على ارتفاع 25 سم .. غطى المكان ده بملاية متعلقة على حبل … تمام ؟ كده بقى عندك حمام .. كده المكان تقريبا جاهز .. انسى بقى كل حاجتك اللى رميتها من الاوضة دى .. لأنك مش هتطلع منها نهائيًا وهدومك البيضا اللى جمعتها لمها فى كيس أو شنطة (الكيس انضف .. هتعرف ليه مع الوقت(. انسى إن أهلك موجودين بره الباب ده .. مش هتسمع أى حاجة من بره غير تليفزيون على القناة الأولى أو التانية ويمكن قناة النيل للأفلام (يعنى مش هتسمع غير تسلم الأيادى) بس الأكيد إن فى صداع وزعيق وشتيمة من أبشع الشتائم – دى هتبقى واضحة ومفهومة. هتتعرف على أسامى جديدة؛ شفة – بطة – العريان – ضبو – خربوها – …. مش مهم … كل يوم الصبح الساعة 7 هفتح عليك الباب تطلع الزبالة وهتلاقى شوية طماطم وخيار وعلبة جبنة مرميين على الأرض .. خدهم بسرعة علشان هنقفل الباب .. حاول تكمل نومك .. ساعتين هفتح عليك الباب تانى تخرج بره الأوضة – هتتمشى فى الطرقة ½ ساعة (طبعا مفيش خروج يوم الجمعة ولا أى يوم أجازة) … تمام ؟ ادخل تانى .. ربنا معاك بقى لتانى يوم الساعة 7 الصبح . أهلك .. فاكرهم ؟ طب الحمد لله هيجولك ½ ساعة كل أسبوع (كانو 10 دقايق قبل كده) مش هتشوفهم كلهم .. هتشوف 2 بس كل أسبوع – ممكن يبقوا بالصدفة 3 بس متتعودش على كده – هيجيبولك أكل .. خلصه فى نفس اليوم علشان لو ركنته هيبوظ من الحر أو الصراصير (متقرفش منهم مش هتعرف أصلا بييجو منين9. أصحابك .. فاكرهم ؟ انساهم بقى ! وقرايبك ونسايبك انساهم برضه .. حاول بقى تستخدم كل شئ حواليك .. اعمل من الصابون لصق، ومن الزيت نار، ومن كرتونة المياه ترابيزة وكرسى، شد حبل فى الاوضة واعمله حبل غسيل … تمام ؟ انت كده فى السجن فاضل حاجة مهمة مفروض تعرفها … لو بنتك هتتجوز مش هتحضر فرحها لو أخوك مسافر مش هتودعه لو أمك ماتت مش هتحضر جنازتها شغلك واقف حياتك مجمدة أهلك وحشوك ومراتك هتموت من شوقها ليك … تماام؟ كده تقريبا شبه السجن .. تعيش كام يوم كده ؟! وافتكر إنك مبرطع فى أوضتك .. معكش 11 واحد كمان فى نفس المساحة ! أنا بقالى 180 يوم كده .. ½ سنة إذا أردت أن تعلم مدى معاناة المعتقلين تخيل هذا الوضع التقريبى وجرب ولو يوم لتشعر بهم .. كم يعانى أصحاب لك من ظلم السلطة ! واعلم إن اللى ايده فى المياه مش زى اللى ايده فى النار.