اسم السجين (اسم الشهرة) : عبد الرحمن محمد مصطفي المرسي الجندي (عبد الرحمن الجندي)

النوع الاجتماعي : ذكر

تاريخ تحرير أو نشر الرسالة : 10/11/2014

السن وقت الاحتجاز: 18 عام

الوظيفة – نشاط بالمجال العام: طالب بكلية الهندسة بالجامعة الألمانية بالقاهرة

مكان احتجاز المرسل : منطقة سجون طرة

السباق خلاص بكرة

“السباق خلاص بكرة! اتمرنت كتير و طلع عينى عشان أجهزله ، اشتغلت على كل الجوانب و جريت كتير و ظبطت لياقتى و دلوقتى حاسس بثقة كبيرة و مش قادر أستنى عشان أبدأ بكرة و أكتسح السباق و أوصل فى المركز الأول.
صحيت متحمس و جهزت كويس و سخنت جامد و نزلت ، وصلت خط البداية و حواليا المتسابقين فى المستوى بتاعى ، وقفت على الخط و أنا مبتسم بثقة و بصيت للى حواليا بتحدى ، و أنا مش قادر أستنى عشان أنطلق و أطير و أسبقهم كلهم. خدت وضع الاستعداد و جهزت للتألق ، و مرة واحدة رجلى غرزت فى الأرض و معرفتش أطلعها ، الطلقة اتضربت و الناس انطلقت و أنا واقف فى مكانى مش عارف أبتدى ، قعدت أنادى و أصرخ إنى محبوس هنا و محدش سائل فيا ، صرخت إن ده ظلم ، محدش عبرنى ، قعدت أشد فى رجلى مبتطلعش ، ناديت حد يساعدنى مردش ، واحد جه و معرفش يعمل حاجة ، قالى معلش و مشى و سابنى.
شوية و لقيت المتسابقين بتوع المستوى الأقل منى وصلوا ، و وقفوا و استعدوا ، و الطلقة اتضربت تانى ، و كلهم جريوا ، و أنا مش فاهم ازاى ده حصل! أنا المفروض أعلى من مستواهم! ازاى يسبقونى؟ أنا اتمرنت كتير و سخنت كويس و كنت جاهز للتألق!
بس و لا الهوا ، سبقونى و وصلوا و أنا محشور.
السباق خلص. و اللى كسب كسب. و اللى خسر خسر. و الأول تألق.
و أنا واقف متكلبش فى خط البداية ، و مش عارف أبتدى..”