اسم السجين (اسم الشهرة) : عبد العزيز يوسف (زيزو)

النوع الاجتماعي : ذكر

تاريخ تحرير أو نشر الرسالة : 8/23/2015

السن وقت الاحتجاز: غير معلوم

الوظيفة – نشاط بالمجال العام: محامي

مكان احتجاز المرسل : قسم شرطة بلبيس

لسان حالي وانا نازل من بيتنا 

(١)
لسان حالي وانا نازل من بيتنا المحاصر بقوات خاصة ومدرعات وبوكسات كتير وعساكر ملهمش عدد ظباط جيش وشرطة ولواءات وظباط علي كتافهم نجوم كتير ( ايه دا ياجدعان دا انا طلعت جامد اوي وانا مش_واخد باللي كل دا عشاني انا )
(٢)
السؤال اللي كان شاغل بالي طول الوقت ومش لاقي ليه اجابة هي البلد دي عايزة مني ايه ؟!!!!!
ايه الجريمة اللي انا ارتكبتها تخلي الدولة بجلالة قدرها تتهز وتحرك كل القوات دي بكمية السلاح اللي كانت معاهم عشان تقبض علي شخصي الضعيف
ليه كل دا مع انه لو كان السيد وكيل النيابة مصدر اذن الضبط والاحضار طلب مني الحضور للتحقيق وانا كل يوم قدامه كان هيلاقيني في مكتبه من غير قوات ومصاريف
خواطر كتير بتمر علي دماغي مصالح الناس اللى انا مسئول عنها وشغلي ومكتبي ،انا ليه مسافرتش زي ماكل الناس نصحتني وليه ضيعت من ايدي عشرات الفرص للسفر ،انا ليه كل مرة كان بيكون قدامي اختار افضل هنا ولا اهرب بجلدي من الخرابة دي كنت بختار اكمل هنا ، هو انا صاحي ولا بحلم ودا كابوس هيخلص وينتهي بمجرد ما افتح عيني
(٣)
نظرات طويلة متأملة للشوارع اللي كنت بحب امشى فيها في الوقت دا من الليل وهي فاضية من البشر واللي ممكن اطلب منها تحضر في النيابة وتشهد لي اني عمري ما سعيت في شر ، الشوارع والبيوت اللي ياعالم هشوفها تاني امتي
(٤)
استغلال للوقت في الطريق للمجهول اللي انا رايح ليه في اني اتنفس انفاس عميقة متلاحقة لأني اعرف كويس من حكاوي السجينات والسجناء وزياراتي المتلاحقة لمقرات الاحتجاز والمقرات الشرطية إنه الهوا جواها مسموم وبيجيب كئيب
(٥)
ولسه في الانتظار والوقت بيعدي بشكل ابطئ واسئلة كتير ملهاش اجابات اهمها هو ليه بجد كل دا يحصل مع واحد زي حالاتي واخد قرار من فترة طويلة انه السياسة مش معركته وانه راجل مهني بيشتغل محامي وفقط بمعني ادق حياته محاماة وشوية حاجات بسيطة جنبها
(٦)
عرض نيابة وسيارة ترحيلات قميئة بائسة وعساكر بتحاول تبقي لطيفة معايا وشوية احباط كتير وتعب وحر واحساس بالإهانة وكلابشات وحبسخانة المحكمة وانك تتحول لرقم بيتعد وشكرا من غير تفاصيل رقم مش بشر ومفاجأة جميلة تهون علي نفسي كل حاجة وكل تعب بعدها هين لمة الحبايب وزمايلك الجدعان الرجالة اللي جايين من كل مكان يقفوا جنبك وفي ضهرك في وقت محنتك لحظتها عرفت انا ليه كل مرة كنت بختار افضل في البلد ومسافرش انا كنت بقرر القرار دا في كل مرة عشان البلد الخرابة الظالمة فيها صحابي الجدعان دول وهما الحاجة الصح الجميلة الوحيدة فيها
(٧)
الحرية جميلة ونعمة وحياة ومن غيرها احنا مش عايشين وانا حقي اكون حر والسجن مش مكاني انا لاعمري كنت مجرم ولا خالفت قانون انا عارف انه كل بامر الله بس يارب انا محتاج ارجع لحياتي ومكتبي ورسالتي
خطابات اسراء الطويل وكلامها عن ظروف احتجازها والقبض عليها كانت سند ليا ورسالة انه استرجل دي البنت الضعيفة حصل معاه كل دا وانت اللي محصلش ليك ١٠٪ من اللي حصل لبها مش قادر تصبر وقلقان ومتضايق
طول الوقت بفتكر كلام ماهينور ( مبنحبش السجون بس مابنخافش منها )
(٨)
عن اول لحظة شوفت فيها قوات فزع مش امن محاصرة بيتك ورعب اهلك وخوفهم عليك واول ليلة في السجن وانتظار المجهول واول عرض نيابة واول زيارة وتجربه جديدة مرهقة ومتعبة ومؤلمة زيها زي تجارب كتير دخلتها وزي مابنقول دايما
((ياما دقت عالراس طبول ))
دعواتكم ربنا يفك الكرب ويزيل الهم وشكرا لكل الناس اللي اهتمت تساند مظلوم اسمه عبدالعزيز يوسف – محامي