اسم السجين (اسم الشهرة) : عبد الله زكي

النوع الاجتماعي : ذكر

تاريخ تحرير أو نشر الرسالة : 9/9/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : مكان احتجاز غير معلوم

أزيكم أنا عبد الله زكي

ازيّكم؟
أنا إسمي عبد الله محمد عبد الله زكي، عندي 21 سنة، في كلية حقوق جامعة السادات، انا حالياً مسجون ومحكوم عليّا ب 15 سنة من محكمة عسكريّة بقالي حوالي سنتين وشهر، وأنا والله العظيم معملتش حاجة أنا بس كنت نازل اتفسّح وألف شويّة في المدينة، كتبت عندي بوست قولت انا هخرج عشان يعني لو حد من صحابي يجي معايا،خرجت مع واحد صاحبي روحت معاه للدكتور وبعدين قولنا نروح ناكل حُمص الشام من عند محمود الفار اللي عند سوق الأولى كل أهل المدينة عارفينه، المهم وانت رايح لمحمود بتاع الحمص لازم تعدّي على مول اسمه مول السّلام وعديت من هناك لاقيت نفسي جوا البوكس انا وصاحبي، وانا مش فاهم أي حاجة ومعرفش ايه اللي بيحصل، فتحت فيسبوك وكتبت عندي إنّي اتمسكت. روحنا القسم وهناك عرفت ان كان في مظاهره للاخوان وكسروا بوكس شرطة، صاحبي اللي معايا خرج وانا مخرجتش، معرفش ليه ومش فاهم ليه! فضلت تقريباً غير مدرك اللي حصل ده حصل ازاي لانه حصل ف خمس دقايق تقريباً انقلب اليوم من خروجة عشان حمص الشام ل كلابشات ويوم ورا التاني لاقيت القضية اتحولت عسكري واخدت حكم 15 سنة وانا مازلت مش فاهم!
انا والله العظيم والله العظيم معملتش حاجة ويمكن اغلب الناس في المدينة يعرفوني ومتأكدين اني مظلوم.
انا عندي نقض يوم الاثنين الجاي لو اتقبل هنزل جلسة ويمكن الحكم يتخفف او براءة الله اعلى واعلم، انا راضي بقضاء ربنا بس السجن وحش، السجن اللي عمري ما تخيلته ولا جه ف بالي اساساً لاني دايماً بعيد عن المشاكل.
محتاج مساعدكتم، انشروا البوست ده عنّي، عرّفوا الناس كلها اني والله مظلوم،السجن وحش، والاربع حيطان عاملين زي المقبرة، وكمان انا امّي وحشتني اوي،وأبويه واخواتي وصحابي.
اتكلموا عنّي متنسونيش.. انا مظلوم.