اسم السجين (اسم الشهرة) : عماد عبد الحميد

النوع الاجتماعي : ذكر

تاريخ تحرير أو نشر الرسالة : 1/27/2014

السن وقت الاحتجاز: غير معلوم

الوظيفة – نشاط بالمجال العام: عضو بحركة طلاب 6 أبريل

مكان احتجاز المرسل : منطقة سجون أبو زعبل

أنا مش عارف أنا محبوس ليه

أنا مش عارف أنا محبوس ليه ولا قتلت ولا خربت ولا سرقت ولا أفسدت الدولة! بيطبق علينا الحبس الاحتياطي كعقاب… بنبقى عارفين كام واحد خارج وامتى قبل ما نروح الجلسة أصلا! مش عارف ايه لازمة ترحيلنا 6ساعات رايح جاي! وإيه لازمة إننا نتعب القاضي والمحامين والدولة؟!.. الجميل بقى ان في ناس كان معاها أحراز وخرجت وناس أعضاء في تنظيم الإخوان وخرجوا! كالعادة بلدنا متميزة بالدقة والعدالة والكفاءة الأمنية! أنا بقول إننا نخرج من هنا والدولة تشوف للشباب عقود عمل بره مصر ونهاجر كلنا ونسيبها للناس بتوع طوابير الاستفتاء والمواطنين الشرفاء. ده حل هيوفر على مصر مصاريف أكلنا وشربنا في السجون من قلة الفلوس العربية الكارو اللي بتلم الزبالة بيتحط عليها الأكل!!! ماهو البلد هتجيب منين تصرف علينا يعنى!!.. أنا مش هقول أنا كرهت البلد الفكرة ان بلدي ليها مواصفات معينة. زى عادى في بلدي أنى أتمسك من غير تهمة أو حرز واقعد شهر في السجن.. وعادى في بلدي انى اتضرب واتعذب وان وشى كله يبقى دم ويتداس على ضهرى بالبيادة علشان قالوا عنى انى خاين وعميل!!.. عادى في بلدي انى وأنا داخل السجن اقلع هدومي كلها في السقعة وازحف على الأرض وسط تهليل وتحفيل المرضى النفسيين.. ! وعادى انى يتوصى عليا بسبب انتمائي واقعد ساعتين وشى للحيطة غير الشتيمة والإهانة والتهديد والإرهاب النفسي !.. أصل الباشا قالي أنت يا عماد مش هتنفع تانى!.. يلا بقى خد تجديد ثم تجديد ثم تجديد… قدرى زى ما قالوا هما أول خمس سنين بس هما اللى صعبين. اه قبل ما انسي أحب أقولكم إننا من سنتين أو تلاتة مكنش حد بيقدر يعمل معانا كده ونقعد ساكتين له. دوروا على مواطن الضعف في وسطنا وعالجوها علشان لسه بدري قوى والمشوار طويل لسه.