اسم السجين (اسم الشهرة) : عمر علي حسن عبد المقصود (عمر عبد المقصود)
النوع الاجتماعي : ذكر
تاريخ تحرير أو نشر الرسالة : 10/19/2016
السن وقت الاحتجاز: 27 عام
الوظيفة – نشاط بالمجال العام: صحفي بموقع مصر العربية وطالب بكلية التجارة بجامعة المنصورة
مكان احتجاز المرسل : منطقة سجون جمصة
حبيبتي وستي وتاج راسي
بسم الله الرحمن الرحيم
حبيبتي و ستي و تاج راسي ..
بندقة “الملووحة” ههههه
الف مليون سلامة عليكي يا ست الكل.. ايه يا حبيبتي؟ .. انت محسودة ولا ايه؟! كل اسبوع كده في مشكلة؟! إرقي نفسك يا ماما و الف سلامة عليكي..
تعرفي بقى انا كمان عندي مشكلة في رقبتي؟! 🙂 بس الناحية الشمال بس .. وداني ملتهبة بقالها فترة و القطرة جابت نتيجة في الاول بس، بعد كده ماعادتش بتجيب و بدأ الالتهاب بيسمع في اللوزة الشمال، فبدأت احس انها وارمة ولما بلف رقبتي ناحية الشمال بتوجعني 🙂 اه والله.. بس الحمدلله مفيش وجع .. اه صحيح .. باخد مضاد حيوي برده 🙂 شفتي بقى 🙂 .. اما والله صدف ههههههه
حبيبتي انا اسف لو كنت بقلقك عليا.. مقصدش والله.. بس انت عارفة اني مليش غيرك بعد ربنا احكيله و اشكيله.. و كمان مش بحكيلك علشان اخليكي تيجي زيارة او الجو ده..
انا تعبت يا امنية .. تعبت من اللي حواليا و من السجن و العجز و تعبت من بعدي عنك.. انا المفروض مكاني مش هنا .. مكاني في حضنك .. و مكانك في حضني.. تعبتلك و تعبتلي وتعبت للناس الي حوالينا .. تعبت لابويا وامي الي ماعادوش زي ما كانوا .. كبروا يجي عشر سنين .. تعبت من الانتظار .. برغم كل ده عارف ان ربنا عمره ما هيسيبنا.. و انه شايل لينا حاجة حلوة اوي قدام.. اصل دي سنته في الكون .. بس انا تعبت .. هو انا مش من حقي اتعب؟!! ولا عيب أتعب ؟!! انا ما يأسش لأ.. انا تعبان بس..
انا فعلا مش عايزك تيجي زيارة.. خايف عليكي.. تعبك نفسيا.
