اسم السجين (اسم الشهرة) : فكريه محمد محمد محمد (رانيا الشيخ)
النوع الاجتماعي : أنثى
تاريخ تحرير أو نشر الرسالة : 5/20/2015
السن وقت الاحتجاز: 19 عام
الوظيفة – نشاط بالمجال العام: طالبة ثانوي
مكان احتجاز المرسل : منطقة سجون القناطر
شباب الثوره الجدعان
“شباب الثوره الجدعان … لقد اشتقت لكم.. وحشتونى قد ما وحشنى هوا الحرية والطريق من الشعبية للشون وساندوتشات الحواوشى اللى عند عمو اللى فى البندر .. واكل الساندوتشات دى من البندر للزراعة وكل مكان كنت وسطكم فيهتعالو بقى احكيلكم بقى على شوية حجات.. مبدئيا انا الحمد لله بخيرمنه وأبرار ويسرا بنات معايا هنا سياسة برضه ( اخوان ) كان عندهم زيارة كده من كام يوم … المهم لما خرجو كانت يسرا كاتبة بقلم على طرحتها (اثبت مكانك(الاول يسرا هيا اكبر واحدة فينا فبتحاول ديما انها تمدنا بالثبات والقوة حتى لو بمجرد كلام مكتوب…بعد ما دخلت الزيارة دخل وراها شخص وخرجها من الزيارة وقال لها ادخلى اقلعى الطرحة دى وهاتيها وبالفعل عملت كده وطلعت تديهاله وقالتله انت فهمت ايه من الكلمة عصبك بالشكل ده ؟!… اخد الطرحة منها وبكل كراهيا وعداء واستهزاء ولع فى الطرحة وراماها لها فى الارض وللاسف كل ده كان قدام والدة يسرا فكانت النتيجة ان والدتها وقعت فى الارض ويسرا تتعب وترفض الكلام نهائى والسجن كله يتقلب عشان خاطر كلمة ( اثبت مكانك ) … لكن الحمد لله يسرا فهمت اننا مافيش فى ادينا اى حاجة واننا ملناش ذنب وقدرنا نخليها تتكلم معانا .الحاجة التانية انى شفت الجدع محمد البيلى وفرحت جدا لدرجة انى مكنتش مصدقة انى شيفاه .. كنت فرحانة وكأنى مثلا خرجت .. بعد ما كنت فاقدة الامل انى اشوفه غير بعد ما اخرج خصوصا لما اتنقلت المنصورة .. قعدت معاه نص ساعة بسمعه بس .. طمنى على الاحرار اللى معاه وعرفنى شوية حجات من اللى بتحصل بره واللى الناس اللى بيجولى محدش منهم بيرضى يقولى حاجة منها .. ما علينا .. قالى كمان ان الشباب اخدو عشر سنين وسعتها كده كان احساسى انى ماشيا فى مسيرة وحد قرر انه يكب علينا مية سقعة او مثلا عمو او طنط اللى بيكونو واقفين فى البلكونة يدلق علينا الزبالة . بس افتكرت يسرا و ( اثبت مكانك ) وحاولت انى مبينش احساسى قدامه وقلتله : ( دومة اخد مؤبد ) _ رد فى منتهى الغباء طبعا انا عارفة _ لانه مش صح انه يحصل بس مكنتش لقيا كلام غير الرد ده وقال يعنى بحاول اوصله ان الموضوع عادى وهوا اصلا مش عادى … كل الموضوع انى مكنتش عايزة اعيط قدامه .. مع ان ده برضه غباء لانه قريب منى وكان عادى انى اعيط قدامه … ما علينا…المهم يعنى ان المحلاويةالجدعان يثبتو والحمد لله انهم احرار … وان شاء الله ديما احرارخدو بالكم من بعض وانا ديما بدعيلكم اسفة انى طولت بقى
