اسم السجين (اسم الشهرة) : محمد رمضان بيبرس (محمد رمضان)

النوع الاجتماعي : ذكر

تاريخ تحرير أو نشر الرسالة : 6/29/2017

السن وقت الاحتجاز: غير معلوم

الوظيفة – نشاط بالمجال العام: محامي بالاستئناف العالي

مكان احتجاز المرسل : مديرية أمن الإسكندرية

عزيزي بيبرس

عزيزي بيبرس
معلهش انى مالحقتش اجيبلك لعبة سوبر مان اللي انت طلبتها مني بس ان شاء الله اجيبهالك ممكن بعد ايام او بعد سنين بيني وبينكً مش عارف مخبيين لابوك ايه
انا عرفت من امك انها قدمتلك في المدرسة وعرفت كمان انها وهي بتقدم طلبوا حضوري وهي قالتلهم اني مسافر مع اني كان نفسي تقولهم ان جوزي مسجون ، انا بقى عايزك انت لما تدخل المدرسة ويسألوك فين ابوك قوللهم (ابويا مسجون ) ولو سألوك مسجون ليه قولهم :
علشان كان بيحلم … بيحلم بوطن افضل، قوللهم كمان ابويا مسجون عشان فقير وكان بينحاز للفقير ، وقوللهم انه حاول يواجه بس الكلاب كانوا كتير ، وان ابوك مش مجرم وان المجرم هو اللي حبسه ، كلمهم عن الثورة وازاي ان اللي خلقها شباب جميل عنيد بس ناقصهم شوية تنظيم وناقصهم يعرفوا ان نظام عبد الفتاح السيسي هو نظام الثورة المضادة وانه نظام شرس لازم يتواجه بالتكتيك مش بالعواطف وان المظاهرات مش هدف انما هي وسيلة لتحقيق هدف نجاح الثورة ،كان فيه وسائل وأليات تانية كتير زي اننا نقسم نفسنا مجموعات تحرك قطاعات الشعب على الاضراب العام .
بس اوعدني ان لو دة حصل انك تكون اول واحد مشارك في الاضراب وتقول لامك انك مش نازل المدرسة يوم الاضراب
المهم اني مش هطول عليك خلي بالك من امك واخواتك البنات وتبقى تروح تبص على جدتك باستمرار ،انا عارف انها محتاجالك اوي اليومين دول عشان انت بتفكرها ب بابا
ابوك اللي بيحبك اوي
محمد رمضان
الخميس ٢٩/٦/٢٠١٧
حجز ترحيلات مديرية امن الاسكندرية