اسم السجين (اسم الشهرة) : محمد شريف السيد متولي حجاب (محمد شريف)

النوع الاجتماعي : ذكر

تاريخ تحرير أو نشر الرسالة : 5/4/2014

السن وقت الاحتجاز: غير معلوم

الوظيفة – نشاط بالمجال العام: عضو بحركة 6 أبريل

مكان احتجاز المرسل : منطقة سجون/تأهيل وادي النطرون

بعد كام يوم هنزل جلسه فصل

بعد كام يوم هنزل جلسه فصل- نطق بالحكم – قدام قاضي المفروض إنه منوط بيه إحلال العدل ونصرته , بس ياعالم القدر مخبي ايه ؟؟؟ هشارككم تجربتي و أكلمكم عن إحساس المسجون .. في أول أيام السجن تفكيرك تقريبا بينحصر في ذكريات القبض عليك ويومين قبلها , والحاجه التانيه أنا هقعد هنا أد إيه ؟؟؟؟ بعد مرور 20 يوم تقريبا بتحس بإحباط كبير وتراجع في المعنويات و رغبه عارمه في الخروج والإنتقام بكل الطرق الممكنه !! بعد 45 يوم بتفقد الأمل تدريجيا في الخروج وبتتعب نفسيا جدا من تفكيرك في تعب أهلك وصحابك , ومدي أهمية الحبسه دي , وهل هتغير حاجه فعلا وتخلي الناس العاديه تتكلم ولا لا ؟؟!! عزيزي المسجون السابق اللي مكملش 60 يوم في السجن , وعزيزي الثوري اللي ما إتسجنش – ربنا ما يكتبها علي حد أبدااااااااا – , أحب أقولكم إن بعد 60 يوم كل حاجه بتتقابل بلا مبالاه تقريبا .. ومفيش حاجه بتشغل بالك غير اليوم هيعدي إزاي ؟! وهتأكلوا إيه النهارده ؟! ومين خارج زياره من عندك عشان تبعت معاه رسايل ؟!! بعد 90 يوم بيجيلك راحه نفسيه رهيبه ومش مهم تخرج لأنك بقيت سجين قديم (يعني خبره ) , هيعملوا فيك إيه تاني بعد السجن ؟!! هيعدموك ؟!! و يا سلام بقي عنبرك لما يكون في وش طبلية الإعدام . (محدش يعرف يعمل معانا حاجه ) ده كان إحساسي في معظم الأحيان من ساعة ما إتمسكت , بس السجن علمني إني لما أخرج لازم أكمل لأن مفيش حاجه هتسكت صوت الحق غير الموت . عشان محدش يتصدم , أنا بأهل نفسي لحكم مش أقل من سنتين يعني 18 شهر , عدي منهم 3 شهور يعني فاضل 15 شهر , وهخرج تاني عشان نسقط النظام . الثوره مستمرة