اسم السجين (اسم الشهرة) : احمد ماهر ابراهيم الطنطاوي (احمد ماهر)

النوع الاجتماعي : ذكر

تاريخ تحرير أو نشر الرسالة : 3/29/2014

السن وقت الاحتجاز: 35 عام

الوظيفة – نشاط بالمجال العام: مهندس – مؤسس حركة 6 أبريل

مكان احتجاز المرسل : منطقة سجون طرة

السيسي اللي هايفور كل المشاكل .. كله بالحب

السيسي اللي هايفور كل المشاكل .. كله بالحب كيف يستطيع المشير حل مشاكل مصر المتلتلة؟! الموضوع سهل وبسيط .. أولاً: طبعاً هايكثف الخطب الحماسية والعاطفية والكلام عن شد الحزام وممارسة رياضة المشي وانتوا نِن عيني من جوه وانتوا روح قلبي. :* :* ثانياً: هايكثف حديثه عن المؤامرات اللي جايه من كل الإتجاهات مش مهم يقول المؤامرات دي جاية منين أو مين بيعملها بالظبط لكن المهم انه يتكلم عن المؤامرات كل شوية. ثالثاً: بما إنه مشير وكده فطبعاً الإدارة الهندسية وجهاز الخدمة الوطنية هايبقوا أهم أسلحته .. عندك ازمة إسكان يبقى الإدارة الهندسية تعمل إسكان شباب .. طيب ودور هيئة المجتمعات العمرانية ايه؟ -مش مهم، المهم دلوقتي يبقى السيسي المعجزة الي بيخلص. طيب والعساكر الغلابة اللي بيشتغلوا هل هياخدوا رواتب عمال وفنيين؟ -أكيد لأ طبعا طيب هل خطة السيسي للإسكان مرتبطة بخطة تعمير شاملة أو استبدال العشوائيات؟ -أكيد لأ .. المهم الناس تنتخبه الأول مش مهم اثار عشوائية اتخاذ القرار بعد 20 سنة. عايز تعمل طرق جديدة وكباري وأنفاق؟ . -سهلة .. الهيئة الهندسية للقوات المسلحة تخلص الموضوع .. الأراضي بتاعة الجيش وهانبيعها للدولة بسعر مخفض ومفيش أكتر من العساكر. طيب والهيئة العامة للطرق والكباري؟ -ممكن تنضم للقوات المسلحة. عايزين اكل؟ .. -عندنا جهاز الخدمة الوطنية ومزارعنا موجودة عايزين علاج؟ .. -جهاز الكفته موجود. وماذا عن الدولة؟ الوزارات؟ عن تطوير الجهاز الإداري للدولة؟ -مش مهم .. كل دي شكليات. وماذا عن التصنيع؟ -المصانع الحربية تسد. وماذا عن الاقتصاد؟ -المؤسسة العسكرية تقدر تعطي قرض لخزينة الدولة في أي وقت. وماذا عن حقوق الانسان؟ ماذا عن الديمقراطية؟ -المزعجين هانحطهم في السجن، وعندنا الناس بتوعنا من الأكاديميين والشباب الطموح اللي جعان على السلطة اللي هانسرحهم على الفضائيات يتكلموا عن المؤامرات والطابور الخامس والسفريات وشوية تحابيش كده .. وشعبنا بيحب الكلام ده والتسريبات دي قوي. وكده كل حاجة هاتبقى زي الفل. طيب والدولة؟ -العسكر هو الدولة والدولة هي العسكر … الديمقراطية هي ما يريده العسكر ومايسوقه العسكر في الاعلام ومن يعترض فهو بالطبع خائن وعميل. وماذا عن ثروات قادة الجيش، ثروات المشير واعضاء المجلس العسكري ونصيبهم من مشروعات وإقتصاد القوات المسلحة الخفي؟؟ -من يتحدث في هذا طبعاً خاين وعميل وعايز يثير بلبلة. كله بالحب .. المشير هايحل مشاكل مصر بالحب، وبلاش الكلام بتاع الخونة والعملاء بتاع الشفافية والذمة المالية للمشير وقادة العسكر، أو بدعة الدولة المدنية .. أو الدولة أصلاُ. وإزاي تفكر أصلاً في إنتقاد المشير .. اللي يشكك في السيسي وقدراته مش وطني .. كله هايتحل ومش مهم جيلين تلاتة نضحي بيهم علشان خاطر الجيل الرابع يعيش. الجيل الرابع من المصريين مش الجيل الرابع من الحروب بتاع الخونة معارضين السيسي. أحد ماهر ليمان طره 29-3-2014