اسم السجين (اسم الشهرة) : محمود مصطفي عبد اللطيف
النوع الاجتماعي : ذكر
تاريخ تحرير أو نشر الرسالة : 6/17/2014
السن وقت الاحتجاز: غير معلوم
الوظيفة – نشاط بالمجال العام: طالب بكلية التمريض بجامعة المنصورة
مكان احتجاز المرسل : قسم شرطة المنصورة أول
اصحابي وحبايبي اخباركم ايه؟
اصحابي وحبايبي اخباركم ايه متبطلوشي تبعتوا جوابات تسلموهالي في اي حاجه هاتجيبوها ..
انا زي الفل هنا قاعد مع ناس زيكم هنا خالد شهاب ووليد السمري ومصطفي عبدالحي وعبدالله ناصر ودكتور احمد معتمد وناس كتير اوي
هنا اكتر من 50 معتقل سياسي في قسم اول متوزعيين ,,
انا في زنزانه الجنائيين شكلهم كدا بيحبوني شويه قاعد مع اكتر من 100 جنائي في زنزانه ادعولي يرحلوني السجن او جمصه حياه تانيه فيها ملاعب والدنيا حلوه هناك يارب اترحل وهاشفكم هناك ونعقد مع بعض في مواعيد الزيارات ولكن هنا عذاب ومعاناه الحمد لله وجود السياسي معانا مصبريني علي الوضع سلامي لكل الناس عندكم امانه … ربنا ييسر واخرج ونتقابل ونخرج مع بعض تاني ان شاء الله مع بعض طمنوني دايما علي احوالكم بلغو صاحبى يخلي باله من اهلي وبلغو اهلي ….( كلام خاص بالبيت ) …..
شكرا علي المصحف والسبح والكلام الجميل دا .. حبايبي طبعا خلو بالكم من بعض بقي وطمنوني عليكم دايما يارب اخرج قبل الدراسه وما اخدش حكم ربنا ييسرلنا انا الحمد لله كويس جسمي ظبط والجروح راحت واخدت شويه مراهم وادويه ظبطت الحمد لله ..
ولاد الكلب هنا مرضيوشي يودونا المستشفي مع ان في المجموعه اللي معايا فيهم اتنين دراعهم مكسورين بس الحمد لله الدكاتره اللي هنا ظبطوهم ( المعقتلين برده ) انا الحمد لله هاخد فرصتي واطول شعري لو حلقت هازعل اوي امانه عليكم تبعتوا ظاقيه او كلبوش او اي حاجه اغطي بيها القرعه لو حلقت
االحمد لله الايام هنا بتعدي بسرعه خالص احنا مقضينها صلاه وقرأن والاوضاع الايمانيه عاليه اوي الحمد لله وصلو لأهلي رساله ياخدوا الحاجه اللي في الامانات هنا في القسم علشان متضعيشي سلام لكل الناس الجدعه ان شاء الله اخرج قريب ونخرد تاني ونظبط الدنيا ونخربها سلام تاني للناس الجدعه والحبايب الحلوين ,,
؛؛ وظننا بالله انه لن يضيعنا
