اسم السجين (اسم الشهرة) : مصطفي جلال محروس علي عاشور (مصطفي جلال)

النوع الاجتماعي : ذكر

تاريخ تحرير أو نشر الرسالة : 6/28/2014

السن وقت الاحتجاز: غير معلوم

الوظيفة – نشاط بالمجال العام: طالب بكلية الصيدلة بجامعة المنصورة

مكان احتجاز المرسل : منطقة سجون طرة

متنسوناش أو على الأقل لو أسمنا اتقال قدامكم أبقوا قولوا مش إرهابيين

فاكرينا ؟!!
طيب فاكرين ياسر وعامر والعراقى ؟؟
طيب راجع أسماء المعتقليين اللى فى الكليه كدا ؟!! 26 واحد
مكملناش سنه على اعتقال ياسر والرجاله ونسيناهم فما بالك لو عدى اكتر من كدا …
شغف البدايات :- كل حاجه أول مابتبدأ بتبقى ليها حموه وبعد كدا بتخف … مش مشكله الزمن بينسى ودى طبيعة البشر …
– كام حاجه بس حبيت اقولها ومعرفتش قيمتها الا هنا
———————————————————–
1- أهلك :- أدى لأهلك حقهم من وقتك ومن نفسك لأن مش هتحس بقيمتهم الا لو “لاقدر” بقيت فى موقف زى دا .. لما يبقى الوقت اللى ممكن تشوف فيه أهلكنص ساعه كل اسبوع هتحس بقيمتهم .. فأدى لأهلك حقهم من وقتك

2- متضيعشى لحظه ممكن تقضيها مع الناس اللى بتحبهم وأصحابك لأن بعد كدا هتفتكر كل لحظه كنت معاهم فيها وكل لحظه كان ممكن تكون فيها معاهم وضيعتها وتندم عليها

احنا زى الفل الحمد لله مش ناقصنا بس الا ان احنا نشوفكم ونبقى معاكم …
رجعنا طره بقى وسيبنا ياسر والرجاله للأسف بس الحمد لله هما تمام .
ياسر كالعاده قليم بدور أم العروسه وشايل هم الرجاله كلها تحسه ابوهم كدا :))
عامر تخن اوى بقى فى حجم ميكروباص 14 راكب
عبدرب النبى بيقلوله هناك “مازنجر” بقى مفترى وماشى يفترى على خلق الله :))
بس كلهم بخير الحمد لله وبيسلموا عليكم …
دفعة رابعه :- الف مبروك التخرج كان نفسى أكون موجود معاكم بس الظروف بقى معلش :)))
عرفت انكم عملتوا بالطو داى وكدا كان نفسى اكون موجود وامضى بقى على البالطوهات فكل واحد يشوف فى البالطوا حته فاضيه كدا ويعمل مربع صغير ليا لما ربنا يكرم وأطلع أبقى أمضيلكم فيها ” لو ربنا أراد ان احنا نخرج ” .. مبروك تانى التخرج
حاجه أخيره :- متنسوناش أو على الأقل لو أسمنا اتقال قدامكم أبقوا قولوا مش أرهابيين :))

“مصطفى جلال”