اسم السجين (اسم الشهرة) : ياسر محمد الباز غبور (ياسر غبور)
النوع الاجتماعي : ذكر
تاريخ تحرير أو نشر الرسالة : 10/2/2014
السن وقت الاحتجاز: غير معلوم
الوظيفة – نشاط بالمجال العام: طالب بكلية هندسة البترول بجامعة قناة السويس
مكان احتجاز المرسل : قسم شرطة المنصورة ثان
لما بحب أحلم بالخروج من السجن
لما بحب أحلم بالخروج من السجن , حلم مُستحيل يتحقق إلا في الخيال , بس بحب أحلم بيه وهو أنهم في لحظة ما يذيعوا في المايك إن كلنا هنخرج , كلنا هنخرج دفعة واحدة ويفتحوا الغرف ال 800 معتقل هيخرج , بحب أتخيل الفرحة التي لا توصف البكاء البلا حدود , السجدات الطويلة , الأناشيد , حينئذ سنصير قطعة من الجنة , بتخيل إن أهالينا هيكونوا منتظرين برّه , محدش هيركب عربية ترحيلات كله هيروح علطول على بيته , بتخيل إننا من فرط فرحتنا ومن فرط امتنانا وشكرنا اللامحدود لربنا , كل أثر للحقد والغضب والكراهية هتختفي في اللحظة دي , من الجائز أننا سنودع امناء الشرطة , نودعهم وداع حار وممكن نبكي كمان , بتخيل في اللحظة دي التسامح هيطير علينا بشكل كامل لدرجة تُقربنا من المثالية ..
برغم استحالة الحلم ده و إنه ممكن يكون ساذج إلا إني بحب أفكر فيه و أسترسل في تخيل اللحظة الرهيبة دي
