اسم السجين (اسم الشهرة) : محمد حسام الدين محمود علي (كالوشا)

النوع الاجتماعي : ذكر

تاريخ تحرير أو نشر الرسالة : 12/7/2014

السن وقت الاحتجاز: 18 عام

الوظيفة – نشاط بالمجال العام: طالب بكلية الحقوق بجامعة عين شمس

مكان احتجاز المرسل : منطقة سجون طرة

أزيكم عاملين إيه

“ازيكم كلكم ؟
يارب تكونوا بخير زي ما انا كويس و بخير
بكتبلكم وانا قاعد علي مصلبي المتواضع ذو الستارة والمخدة السفنج وقلمي و كراستي
اضحكوا عشان انا بضحك و بحمد ربنا علي كل شيء
صلوا وادعوا نخرج من هنا لاننا قاعدين كل واحد لوحده في اوضة مع جنائيين
مش هطلب منكم اي حاجة تضركم “لاني عارف الوضع الحالي عامل ازاي”
بس طالب منكم انكم اوعوا تنسونا , لا ن في ناس كتير اتنست ولحد دلوقتي محبوسين.
*اعملوا ما في مقدرتكم “فكروا و بعد كدا خططوا و بعد كدا نفذوا”
— و زي ما انا ببعتلكم جوابات و بطمنكم عليا .. ابعتولي جوابات و طمنوني عليكم .
طمنوني علي احمد ايمن واحمد جمال زيادة و بلغوهم سلامي جدا وقولوهم “المجد للمجهولين” وفرجه قريب ان شاء الله .
اوعوا تنسوا البوست اليومي بتاعي “طبعا انتوا عارفينه ”
*بقولكم ايه ؟ هو مفيش اي اخبار كويسة عن اي حد الواحد يفرح كدا من قلبه بدل ما انا قاعد كدا بحاول افرح نفسي بأن اكيد انتوا في حاجات حلوة في حياتكوا.
علي العموم سلامي لكل جدع اعرفه و معرفوش ولكل جدعة اعرفها و معرفهاش ..
A.C.A.B
كالوشا
سجن القاهرة “تحقيق” بمجمع السجون طرة عنبر 2 غرفة 2/12
7/12/2014
المجد للمجهولين”