اسم السجين (اسم الشهرة) : اسراء محفوظ محمد محمد الطويل (اسراء الطويل)
النوع الاجتماعي : أنثى
تاريخ تحرير أو نشر الرسالة : 11/18/2015
السن وقت الاحتجاز: 23 عام
الوظيفة – نشاط بالمجال العام: طالبة بكلية الآداب بجامعة القاهرة
مكان احتجاز المرسل : منطقة سجون القناطر
بابا أنا آسفة جدا
بابا أنا آسفة جدا على كل اللي حصل لكم بسببي .أقسم بالله ما عملت حاجة و الله العظيم . … سامحني أرجوك .. هم و أنا في أمن الدولة لما لقوا الإعلام اتقلب عليا قالوا مش هينفع يطلعوني من غير قضية و خلوني مرشدة على قصة الفرح و القصر و دول قصتين مش حقيقيين و الله .. و سجلوا لي فيديو بيهم .. و لما عرفوا إني أنا اللي مصورة صور أسماء الله يرحمها خلوني أقول إن القصتين دول عشان أنتقم لأسماء ….. و عملوا الفيلم الهندي دا …
و لما ودوني النيابة فضلت أعيط عشان أكلمكم و يجي لي محامي و رفضوا ..
ووكيل النيابة كدب عليا و قال إنه من حقه يحقق معايا من غير محامي في أول مرة .. و اتفاجأت بأنه جاب محامي من عندهم في التحقيق و كل ما أقول له محتاجة أكلم بابا يقول لي بعد التحقيق ..
وقال لي لازم أقول زي ما قلت في فيديو أمن الدولة … و كان معايا أولاد جايين من لاظوغلي بردو و نزلوا النيابة ….
و لما مش بيقولوا اللي قالوه في لاظوغلي بيرجعوهم لاظوغلي تاني … و أنا خوفت و ما بقيتش عارفة أعمل إيه …..
أنا آسفة أوي يا بابا و الله ما ليا ذنب في حاجة ..و أنا هبلة و مليش في كل اللي بيقولوه ده و الله …و ما عملتش حاجة …
أنا خايفة عليكم جدا وبدعي لكم طول الوقت و الله و لا أملك من أمري شيء ..
آسفة على كل البهدلة اللي حصلت لكم …
أرجوك بجد سامحني أنا مظلومة و الله .. حقك عليا …و ربنا ينتقم من كل الظالمين ..ربنا يكرمك يا بابا و الله إنت ليك الجنة ..
مش عارفة هنتقابل تاني إمتى … عسى أن يكون قريبا … الله كريم …
