اسم السجين (اسم الشهرة) : محمد عبد الله

النوع الاجتماعي : ذكر

تاريخ تحرير أو نشر الرسالة : 5/1/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : منطقة سجون طرة

أمي الحبيبة السلام عليكي

“أمي الحبيبة السلام عليكي
وحشتيني أوي يا أمي يا رب تكوني في أحسن حال، أنا عارف انك تعبانة اوي و ما بتتكلميش و صامته مش عاوزه تشيلي حد همك ..
أنا عارف اني تاعبك أوي، أنا كل يوم بقيت أتمني الموت علشان محسش بالذنب من ناحيتك
أنا عارف أن السرطان بياكل في جسمك وانك بتحاولي ما تبينيش ولا تتألمي، بتحاولي تداري مرضك عليا، لكن أنا عارف و كأني عايش معاكي!
أنا تعبان أوي يا ماما كل لما بشوفكوا في الزيارة بحاول ما أبينش اني تعبان ولا زعلان، أنا حاسس أن هيجرالي حاجة يا ماما.. أنا خايف عليكي و على زينب و جويرية.. بالله عليكي لو جرالي حاجة خلي بالك منهم..
كان نفسي أكون جمبك.. كان نفسي أريحك من العذاب ده..
هو بابا ليه ما بيسألش عليا؟! مش كفايه أنه رماكي و رماني!
كان نفسي يكون هو أول واحد واقف جمبي، أو حتى جمب أخواتي أو حتي جمب بنتي..
أنا حاسس أن خلاص الدنيا خلصت و اني مش موجود فيها..
بجد أول مرة احس أن الدنيا بتنتهي..
و كأن أنا الوحيد اللي شايف كل اللي حواليا بيبدأ يتساقط!
أنا عارف يا ماما أنك تعبانه جدًا.. بس صدقيني اللي احنا فيه ده اصعب من المرض، أصعب من اي حاجة في الدنيا!
رمضان جاي.. هاتي لجويرية فانوس و فرحيها بيه و افتكروني على الفطار و ادعولي.. أنا خلاص يا ماما بقيت مجرد اسم موجود معاكوا، اسم بلا جسد
محمد عبدالله
الحرية ل أمي مش ليا
طرة شديد 2
# ارحموا أمي و بنتي #”