اسم السجين (اسم الشهرة) : احد الطلاب المحتجزون المعتدى عليهم في ترحيل الطلبة لسجن برج العرب

النوع الاجتماعي : ذكر

تاريخ تحرير أو نشر الرسالة : 6/17/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : منطقة سجون برج العرب

شهادة من احد الطلاب المعتدى عليهم في ترحيل الطلبة

“نزلنا من عربية الترحيلات وبندعي ربنا يعديها على خير من غير مشاكل ، دخلنا السجن ، كل واحد حط حاجته وبدأ التفتيش ، عددنا كان 34 طالب ، كان في مخبر بيمرهنا وبيحب يعمل مشاكل أكتر من غيره ، اسمه “حسن الونش” ، كنا متفقين على إن واحد مننا يكون مسؤول عننا ، وكان هو الوحيد الي بيتكلم مننا وبيهدّي الجو ، وكان حسن الونش ده بيستفزنا وبيهددنا وبيطول لسانه علينا واحنا ساكتين مش بنرد ، وبعد وصلة طويلة من الاستفزاز وصلنا للتشبيه ” التتميم على الأسامي” وجه على اسم مننا نادى عليه ، فرد “أيوة” . الكلمة معجبتش ظابط نظام كان واقف فقام مزعق وقال الاحترام مينفعش معاكم وسحبه بعيد عننا ، ولما المسؤول عننا قرب عشان يتفاهم معاه زعقلنا وقال “كله يرجع ورا”، وشوفنا زميلنا بيتاخد بعيد وبيتضرب من مخبرين ، فكلنا احتجينا وزعقنا فقالولنا “خلاص اهدوا الموضوع هيخلص”، في الوقت دة على طول كان نائب المأمور جه ، ومعاه قوة أمن مركزي وزميلنا اختفى، سألنا نائب المأمور عن مصير زميلنا فرد علينا “هيروح التأديب والي مش عاجبه فيكم يقفلي على جنب” . فهجموا علينا امن مركزي ومخبرين وبعد كدة شوايشة وحتى نباطشية ومساجين من عنابر تانية كلهم بعصيان وشوم كأنهم بينتقموا، والي يقع مننا يتلموا عليه زيادة، طلعنا نجري في السجن لجوة من كتر الضرب وهم بيجروا ورانا، وكل الي يشوفنا في السجن يسحب شومة ويطلع يجري ورانا من كل حتة ، واحنا أصلا مش عارفين نروح فين ، وفضلنا نجري لغاية ما قربنا من مجموعة “هو” الي حواليها سور ، والي فيها عنابر السياسي، لقيناهم قافلين باب المجموعة وعملوا علينا كماشة عند سور المجموعة، كلنا قعدنا في الأرض من التعب والانفعال ونزلوا فوقنا بالشوم والعصيان وكل الي منهم يضرب فينا زيادة ، وهم بيضربونا سحبوا مننا خمسة تانيين للتأديب على طريقة فيلم الأرض بالظبط ، مسحوا بيهم السجن وضربوهم ضرب مشوفتوش قبل كدة ، وكان من الي بيضربونا ظابط نظام اسمه ” البنهاوي” وسحبوا الـ 28 وأنا منهم بالضرب لحد الناحية التانية لعنبر الإجراء.”