اسم السجين (اسم الشهرة) : حمدي قشطه

النوع الاجتماعي : ذكر

تاريخ تحرير أو نشر الرسالة : 7/6/2016

السن وقت الاحتجاز: غير معلوم

الوظيفة – نشاط بالمجال العام: صاحب شركة

مكان احتجاز المرسل : سجن الجيزة المركزي بالكيلو 10 ونصف

أحب أبلغ الباشا أنى عندى حرية

أولا : الله يبارك فيكم وعقبالكم كلكم
وأحب أبلغ الباشا أنى عندى حرية أه واللي عندي حرية رغم سجنك وقهرك لكن عندي حرية ، رغم الاحساس اللى مفيش أعب ولا أقسى منه بأن أبنك أو بنتك تتولد ومتقدرش تشوفها وتشيلها ، ورغم كمية القهر اللى حسيتها ، وأنى للحظات حسيت بالضعف وأنى طيب أعمل اي ؟
واحساس بقلة الحيلة إلا إنه رغم علمي بوصول حرية بسلامة وأنا فعلا حسيت بالحرية رغم السجن ، يا باشا أنا عندي حرية ” إيموشن بيطلع لسانه ” وهعملها أن صوتها ثورة مش عورة .
حفظها شكل عمها سيد وزة وهبلغها هو مات لي وإزاى ، بلغا إزاى تتعلم من طنطتها سناء الثورة والحق ، هحكيلها عن عماتها وأعمامها اللى في المعتقلات واللى بره واقفين جمب المعتقليين والمعتقلات ، يا باشا ويا بيه والله المستقبل بتاعنا وكله حرية .أنا عندي حرية وانت معندكش غير سجن .
ثانيا : كل سنة وانتوا طيبين وعيد سعيد
ولازم تعرفوا وبلغوا كل أهالينا إننا بنحس فرحة العيد لما انتم بره بتعيدوا وإحنا جو هنعيد وهننفخ بلالين كتير في السجن وهنغني العيد فرحة وهنعمل برامج منوعات جوه كفاية إن احنا نعمل إعلام صادق وأكيد برده هنعمل إعلان برضه لأم حسين وهى بتدى حلقها لنبطشي العنبر علشان يجيب لنا الكحك العيد.
طالب حمدى في رساته بتغيير هاشتاج عيدهم في السجن قائلا: “لأن عيدنا فعلا مش هيكون مسجون، إحنا اللى هنأثر فيهم ومش هنسيبهم يأثروا على فرحتنا، قولولهم #سجونكم _ هتعيد هنعلق مكان الشبابيك الحديد بلالين ورسومات فرحة وعيد ولعب على الباب الحديد”.
كل سنة وانتوا طيبين
أنا عندي حرية
سجونكم هتعيد
وبالضحكة نختم وبفرحة العيد وضحكة حرية.