اسم السجين (اسم الشهرة) : احمد ابو ليله

النوع الاجتماعي : ذكر

تاريخ تحرير أو نشر الرسالة : 7/26/2016

السن وقت الاحتجاز: غير معلوم

الوظيفة – نشاط بالمجال العام: –

مكان احتجاز المرسل : قسم شرطة طنطا ثان

إهداء لأمن الكلية

إهداء لأمن الكلية اللي كان عايزني أشتغل مرشد ولما رفضت أرشد هو عنّي وحبسني-إهداء لإدارة الكلية اللي المفروض تدافع عني وللأسف حولتني للتحقيق-إهداء للضابط اللي المفروض يحميني وللأسف عذبني-إهداء لكل ولاد مصر اللي جابتهم نتيجة المشي في البطّال-إهداء لمصر اللي بحبها بس مبتحبنيشالكلام رافض يتكتب بس الدموع لما كترت صممت تحكي، دموع القهر والعجز، دموع الخنقة إنك متعرفش كل الظلم ده هينتهي إمتى الحبسة ما بين أربع حيطان هو الحكم بالموت البطئ، والوقت والتفكير هم السكينة الباردة اللي بيقتلوني بيها … بس هيقتلوني واقف.الواحد كل ما يتخيل إن الأسوأ عدى خلاص وإنها هتفرج يتفاجئ إن القدر لسه شايله الأسوأ.الناس تقريباً اتعودت على خبر تجديدات النيابة وبقى جزأ من حياتها ! أصل الحياة مبتقفش على اللي بيموت فأكيد مش هتقف على واحد محبوس …حتى الإتحاد رجع يمارس نشاطه تاني عشان الدورة التأهيلية وده طبعا بالتعاون مع الإدارة اللي حبستني وسلمتني وبعدها حولتني للتحقيق !البلد بتطردنا منها واللي رافض يمشي بتقتله بالسجن مابين أربع حيطان !وزي ما كتبتها على حيطة الزنزانة :-” عقود عمل ع القفابس العمل برّه هاجر وسيب البلدمفروشة للغربانيعني يا إما السجنيا الشنق يا الهجرةيا إما تهمة جنونيا العيشة عالصلبان “نجيب سروركل الأبواب اتقفلت في وشي ومعدش فاضل بس غير ربنا اللي طمعان في فرجه القريب وفي عدله إن سجّاني يدوق من نفس الكأس .. يا ربّ