اسم السجين (اسم الشهرة) : اسلام الحضري

النوع الاجتماعي : ذكر

تاريخ تحرير أو نشر الرسالة : 5/30/2017

السن وقت الاحتجاز: غير معلوم

الوظيفة – نشاط بالمجال العام: صاحب شركة – مؤسس حركة 6 أبريل

مكان احتجاز المرسل : قسم شرطة الرمل أول

البت نوجا

البت نوجا 🙂
النهاردة اليوم ال 25 في الحبسة دي …
لسة عندي أمل اروح معاكم بكرة .. عايز ألحق مسلسل يوسف الشريف بس تيجي للحق الواحد استفاد من الحبسة دي.
اهو بعد ما الداخلية اخدت الاجهزة بتاعتي اللي بناكل منها عيش ويا عالم هنعرف نجيب غيرها ولا لا فأحتياطي باخد هنا دورات تدريبية علشان اغير المهنة من مصمم جرافيك لتاجر مخدرات
اتفقت على تأجير موقف والموقف دا هو المكان اللي بيتباع فيه المخدرات في الشارع وبقارن بين كذا حاجة لانه بيختلف ايجار الموقف حسب المكان والزبون والشهرة والمادة اللي بتتباع فيه وكمان بحماية ولا من غير ..
وبدأت اتعرف على انواع المخدرات المتداولة بداية من البودرة وتقيمها والحشيش وكل عجينة وسعرها والبرشام الرتامادول والابتريل وابو صليبة وابو شرطة والصراصير واسعار جملتها والقطاعي حباية ونص وربع كمان عشان محدودي الدخل .
المشكلة لحد دلوقتي ان جسمي نضيف ودا مش حاجة كويسة في الحماية بس اتقالي ان الموضوع سهل حباية ابو شرطة ونص صرصار وقطر وهتطلب معايا اشرط نفسي بنفسي ومع اول سبقة ابقى ادق في السجن على كتفي (تعبت من غدر البشر) وابقى اجتزت اختبار الهيئة وربنا يكرم .
يعني اطمني على مستقبلك انتي والواد .
علقت صورة عمر في الليفينج بتاع الزنزانة وحطيت في الركن بتاعي رسايلك ورسايل فهمي وعبد المجيد وبيتين الشعر اللي كتبهم مع انه قلبني فيهم ومكتبش حاجة كدا من وش القفص.
مسيلي على كل الناس ومسا مخصوص لنهى والشيخ والمرشد وسارة وعاطف وفهمي ووليد وجيمي لا وعبد المجيد واسلام ابراهيم وقولي لسوني اني اتبسطت لما شوفته في المحكمة ، ومسيلي على كل اللي واقف جنبك .. اه مسيلي على سعيد عز وقوليله ان بسببه السجينات والسجناء بقوا مسميين الحبسة “حبسة كتاكيتو” ؛ ومسيلي على الولا عمر ومسيلي على نفسك كتير واكيد مش هنسى المسا بتاع قهوة عبد اللطيف
(هذه الرسالة تأتيكم برعاية أندومي الجنرال )
إسلام الحضري
30/5/2017