اسم السجين (اسم الشهرة) : امنيه احمد ثابت
النوع الاجتماعي : أنثى
تاريخ تحرير أو نشر الرسالة : 1/6/2020
السن وقت الاحتجاز: 22 عام
الوظيفة – نشاط بالمجال العام: –
مكان احتجاز المرسل : منطقة سجون القناطر
أنا أمنية أحمد ثابت
انا امنيه احمد ثابت “22 سنه ” اعتقلت يوم 2019-6-15 للعلم اختي كانت محبوسه في سجن القناطر لمده سنه وشهرين على ذمه نفس القضيه اللي انا فيها وانا اتقبض عليا في يوم اخلاء سبيل اختي من بيتي واختفيت 17 يوم ، اهلي ميعرفوش عني حاجه ونزلت نيابه امن الدوله يوم 2019-7-3 على القضيه 148 لسنه 2017 انا حاليا في قسم عين شمس مازلت محبوسه ، اختي اتقبض عليها من المطار وهي عروسه مسافره لجوزها وربنا كرمنا بإخلاء سبيلها وهم بيتأكدو من العنوان لضمان اخلاء السبيل مسكوني كنا بنجهز لحفل استقبالها وملحقناش نفرح بسميه اختي وحرموها مني وحرموني منها وتم احتجاز اختي بعد اخلاء سبيلها 45 يوم واتقابلنا في الحجز بعد ماكنت بتمنى نتقابل ف الحريه كان من حقنا فرحتنا تكمل ،مبلحقش اشوف اهلي واقعد معاهم ..
انا بعاني من المكان اللي انا فيه مفيش تهويه والجو كله دخان وانا مريضه حساسيه صدر وجيوب انفيه وقاعده مع جنائيين وبنام على الارض والجو برد جد والرطوبه عاليه وجالي روماتيزم والمكان كله حشرات عباره عن اوضه صغيره جدا مفيش شباك يدخلنا منه شمس انا نفسيتي اتدمرت محتاجه اخرج لاهلي ومحتاجه اكون معاهم ، انا امي وحشتني واتحرمت من امان بيتنا ومن حضن امي ، احنا بنعاني المكان هنا مفيش خصوصيه بنكون قاعدين والباب بيتفتح علينا الفجر يبهدلونا ويفتشونا ويبهدلو كل حاجتنا ..
انا قضيتي معظم اللي فيها خرجو انا كمان من حقي اخرج عشان اكمل دراستي واكمل حياتي كنت بخطط لحاجات كتير اعملها ملحقتش ابداها ، 7 شهور ضاعو من عمري في اللاشيء كنت هعمل فيهم حاجات كتير كنت هكون مع امي واخواتي واصحابي ، انا محتاجه كل حاجه حرموني منها انا تعبانه جدا وصدري تاعبني من الدخان والدكتور قال مينفعش معايا علاج طول ما انا محبوسه …
ادعولي اخرج لامي ولحياتي واصحابي واخواتي ولفرحه امي اللي اتحرمت انها تكمل ، امي تعبت من الزيارات والطابور في الزيارات ، انا محتاجه اخرج اكمل دراستي وابدا حياه جديده من غير سجن ..
انا عارفه اللي بيخرج بيعاني برضوا مبيعرفش يرجع لحياته الطبيعيه بس اكيد هكون افضل وسط اهلي متنسونيش دعواتكم ….
