اسم السجين (اسم الشهرة) : سولافه مجدي
النوع الاجتماعي : أنثى
تاريخ تحرير أو نشر الرسالة : 1/9/2020
السن وقت الاحتجاز: غير معلوم
الوظيفة – نشاط بالمجال العام: صحفية
مكان احتجاز المرسل : منطقة سجون القناطر
أنا أسفة لأننا مش عارفين نكون معاك
لولو حبيبي وروح روحي وحشتني اد العالم
ازيك يا لولو عامل ايه يا نور عيني
وروح قلبي والنفس الي بعيش بيه
وحشتني قوي يا حبيبي عرفت انك اخدت اجازة نص السنه
عايزاك تسمع كلام تاتا وكل الناس الي بيحبوك عشان خاطري يا روحي
عايزاك تخلي بالك من روحك لحد ما نرجع انا وبابا من السفر
عارف يا روحي انا بستنى الجواب الي بكتبه ليك والي بتبعته من الأسبوع للأسبوع بفضل اعد في الأيام كل دقيقه لحد ما يعدي الاسبوع ويجيلي الجواب بتاعك الرسومات بتاعتك وصورتك بيينامو جمبي كل يوم واقعد اقرأ جواباتك كل شويه عارف يا لولو انا بحلم بيك كل يوم وبشوف كل الأطفال انت
اخبار صحتك ايه يا حبيبي بتاكل كويس ولا لأ اوعى تكون بتغلب تاتا في الأكل يا حبيبي انا قلت ليك انت لازم تخلي بالك من تاتا لانه انت راجل البيت دلوقتي وانشاءالله يا حبيبي انا وبابا هنرجع من السفر ومش هنبعد عنك ابدا وهخبيك في حضني عايزاك تبقى شاطر وراجل يا روحي عايزاك تبقى زي بابا بتخلي بالك من الي حواليك وبتحبهم
بكره تعرف يا روحي بابا وماما بيعملو ايه علشانك خليك فخور بينا زي ما احنا فخورين بيك وبنحبك قوي
بابا وماما ما عندهمش حاجه في الدنيا أغلى منك احنا بنحبك اكتر من روحنا خلي بالك من نفسك لحد ما نرجعلك يا نور عيني
انت وحشتني قوي قوي يا نور عيني
بيني وبينك سور ورا سور
وانا لا مارد ولا عصفور
ماما حبيبتك
