اسم السجين (اسم الشهرة) : محمد الباقر

النوع الاجتماعي : ذكر

تاريخ تحرير أو نشر الرسالة : 4/19/2020

السن وقت الاحتجاز: غير معلوم

الوظيفة – نشاط بالمجال العام: محامي حقوقي

مكان احتجاز المرسل : منطقة سجون طرة

أنا بخير تنقصني رؤياكم وحافظوا على نفسكم

أمي وأختي وزوجتي، وحشتوني جدا جدا جدا، طمنوني عليكم وعلى صحتكم وظروف حياتكم، أنا قلقان عليكم في ظروف مرض كورونا وانتشاره، خصوصا مع السن الكبير
أنا بخير والحمد لله بجد، وصحتي تمام جدا، وبتغدى كويس من أكل التعيين والكافيتيريا، وباخد الأدوية، والنفسية تمام، تنفصني رؤياكم، وإن شاء الله نعدي المرحلة دي على خير، والوباء كمان ونكون مع بعض قريبا يا رب
ماما صحتها عاملة إيه، بتاخد الأدوية بانتظام، خلوا المتابعة مع الدكتور تليفونيا بس، وسارة تاخد بالها كويس جدا مع التعقيم وهي راجعة البيت من الشغل، وأنتي يا نعمة خلي بالك وخليكي وسط أهلك دايما، ووقفوا الزيارات العائلية
أمي حبيبتي، وأختي السند، وزوجتي حبيبة قلبي ورفيقتي، حضن كبير ليكم، حافظوا على نفسكم زي ما أنا بحافظ على نفسي، لغاية ما الحبسة دي تنتهي، ونرجع لحياتنا الطبيعية تاني