عزيزي القارئ؛ أما بعد..
اكتب اليك مخاطبا اياك- مش عارف ليه- الحقيقة- مش عارف ابدأ منين، مش عارف ابدأ بحكي الطريقة اللي اتمسكت بيها والا ابدأ كلامي بالظروف اللي خلتني اكتب الكلام ده! خلينا نبدأ بالظرف الموضوعي اللي انا فيه. بافتراض إن السيسي مش هياخد فترة تانية، عاوز أقول اني مش هاقدر احكي لولادي عنه، لان بقالي 24 شهر في زنزانة منعزلة عن العالم فبالتالي ما اعرفش عنه حاجة خالص.
انا طالب في كلية هندسة قسم مدني وعمارة. في يوم 14/10/2014، نزلت ادفع مصاريف الكلية زي اي حد الحكومة عاوزة تاخد منه فلوس مقابل خدمة المفروض انها بتقدمها له. المهم دفعت المصاريف وبالصدفة قابلت زميلة ليا في الكلية. واتكلمنا عن الدراسة عادي جدا، وفجأة سمعت صوت قوي جدا ووقعت قدامنا قنبلة غاز وسادت حالة فزع بين الطلاب، فميصحش أسيبها لوحدها وقررت أوصلها لعربيتها وبعد كدا أروّح بأي طريقة. وفي الطريق يا سيدي القارئ، قابلت فرد أمن (أمن الكلية) وسألته، وكان رده: اخرج من باب الجراج وما تقلقش.
خرجنا وقابلنا زميل تالت لينا فقولتله نوصلها لعربيتها بعد كده نروّح احنا. ومجرد ما ركبتْ هيّا عربيتها ولسه هانمشي انا وزميلي، هجم علينا 2 واخدوا مننا البطايق. اللي ماسكني ماشي بيا قدام والتاني ماسك زميلي وماشي ورانا، فاللي ماسكني بيقولي انت ساكت ليه قولتله اعمل ايه؟ قاللي مش بتصوّت ليه؟ (سؤال غريب الصراحة اووي) قولتله انا اخاف ليه؟ انا عملت ايه؟ قاللي انت عملت بس قلبك جامد، قولتله بقولك ايه انا عاوز اكلم الظابط، قاللي ما انا الظابط يا حبيبي، فكان ردي (السبب في 24 شهر حبس احتياطي): مش باين عليك. مرت الساعات وصاحبي ده روح بالليل، وانا فضلت. وقبل ما اترحل ع المديرية الظابط قاللي (بمنتهى التحدي والشعور بالنصر): انا الظابط يا حبيبي. وبعد ما كنا 84 واحد اتمسكنا اختاروا مننا 14 واحد –اختاروا اكتر 14 واحد ممكن يكونوا مش مناسبين- بالصدفة البحتة ال 14 واحد ميعرفوش بعض .
اتضح ان الظابط عادي ممكن يلبس T-shirt polo وبنطلون Jeans مش لازم يعني نجوم على كتفه، انا بس الافلام لحست مخي.
بغض النظر عن محتوى الرسالة خليني أقولك ان الكوميديا اللي حصلت في التحقيق والجدال ببن المحققين حول فكرة (الواد ده شيوعي ولا إخوان؟) تنفع تكون material تستخدم في stand up comedy show
عزيزي القارئ...
خلينا في المهم بس.

اتمسكت يوم 14102014 . اتحالت قضيتي للمحاكمة يوم 1062015 . ونازل جلسة يوم 27112016 . وبقالي كل دا بتأجل من غير ما القاضي يشوفنا – بنتأجل حضرتك بالـ 3 و 4 شهور . اتضح بقى ان أنا متهم بقتل واحد كده.. الغريب ان الواحد دا معايا في الكلية، والأغرب اني ما أعرفوش – ازاي أقتل زميلي في الكلية؟؟ أكيد يوم ما أقتل مش هقتل واحد يعتبر زميل مهنة. آه صح.. أنا برضو متهم اني اتلفت أوراق موظفة، بردو معرفهاش. وهذه التلفيات ثمنها يصل إلى 50 جنيه – يعني انا هنا عشان حاجة بـ 50 جنيه، يعني انا بقالي 24 شهر عشان واحد Big Mac chicken ؟؟.. طب ده كلام!! متهم بحيازة خرطوش!! انا ما شفتش في حياتي مسدسات اصلا غير في فيلم Wanted . التهمة اللي خايف منها بجد هي استعراض القوة.. خصوصا اني في جسم الممثل ده اللي اسمه Van Diesel ربنا يسامحني. بجد؛
انا نزلت 25 يناير و 30 يونيو ودول مش تهم اتعاقب عليها . السيسي بيقول ان الشباب هم أمل الأمة والكلام الكتير دا.. يا سيدي القارئ، انا هنا نقطة في مركز مثلث أضلاعه التلاته عبارة عن داخلية وإخوان ومن يطلق عليهم تكفيريين. انا هنا عشان الداخلية بتقول اني إخوان، لكن انا هنا الإخوان بيقولوا عليا مرشد تبع الداخلية.. طب الدولة في حالة حرب عشان الإرهاب. الإخوان مش هما الإرهاب. الجهل والفقر هما الإرهاب . والسجن دا مفرخة الإرهاب والناس اللي بيدخلوا عاديين بيخرجوا إرهابيين بجد؛ مش مظاهرات والكلام دا .
لو عاوز تحارب الإرهاب لازم تعرف ان الجهل والفقر هما اللي بيخلوا الإنسان معندوش شخصية، ولما تتزرع جواه فكرة بيفضل يدافع عنها حتى لو هي غلط، لانها لو انهارت هايكون حاسس انه مالوش قيمة، فيدافع لمجرد اثبات الذات. لو عاوز تحارب الإرهاب حارب الفقر واسجنه عشان الناس لو فضلت مش لاقيه حد يأكلها هتاكل في بعض . الجهل والفقر هما السبب الرئيسي لانهيار الشعوب.
الجهل والفقر هما المتهم الرئيسي في غرق مركب رشيد وحريقة الدويقة وازمة الدولار وازدواجية المعايير وسقوط البلد وإن طالب هندسة هنا بقاله 24 شهر . الإخوان ما حاربوش الفقر والجهل عشان يستخدموه في الوصول للحكم زي اي حد عاوز يحكم بنت المعز.. يا سيادة الريس الجهل والفقر هما سبب ضياع البلد..
يا سيادة الريس هما اللى عملوا منك رئيس. الجهل والفقر هما اللي انتخبوك.
انا هنا دخلت بفكر معين وبتصدى لكل محاولات الاستقطاب اللي بتعرض لها – عمري ما هاكون إخوان ولا هاكون تكفيري. انا مش عاوز حد يسيطر على تفكيري ومش عاوز الاستقطاب دا يحصل – انا بخوض حرب الاستقطاب منفردا عشان بحب مصر (تقريبا يعني) بس هو حب من طرف واحد. انا استُهلكت ماديا وإنسانيا جوه السجن. مفيش فواتير، الحكومة بتحاسب ع الاكل (الغير ادمي) لحد المياه (صرف معالج) مرورا بالكهرباء (ممكن في لحظة تولع الزنزانة ومحدش هايعبرك) ومستشفى بتطلع لو قولتلهم انك عندك صداع هايدوك أنالارج، ولو عندك قرحة برضو هايدوك أنالارج لان مفيش غيره تقريبا، والدليل واحد كان عاوز يعمل كشف نضارة.. برضو أنالارج (حاجة غريبة مش كده؟)
في الزنزانة انا لابس ابيض لون الكفن في زنزانة حجم القبر، وبشوف اهلي كل اسبوع نص ساعة يقرأوا لي الفاتحة ويمشوا. سنتين والمحقق ما وصلش لحقيقة اني بريء.. فين ايام زمان لما كان اللغز بتاع الجرايد بيتحل في اقل من 35 دقيقة – فين ايام المحقق كونان؟؟
مكانش له لازمة ادفع المصاريف – المفروض كنت اتهرب من الدفع زي رجال الأعمال اللي محدش بيحاسبهم عشان الشعب بيحاسب لهم، ولا السيسي ولا مرسي ولا اي حد يقدر يكلمهم .
المهم عشان ما أطولش على حضرتك ؛ انا مش هاستسلم وهواجه كل محاولات الاستقطاب . وأنتو اتطمنوا.. سجون السيسي مش هاتتسع ليكم كلكم عشان مليانة . لو خايف تنزل عشان عيالك فعيالك هيقضوا بقية عمرهم جثث طافية في البحر دا لو مكانش اخرهم طلقة من امين شرطة، ولو ان شاء الله طلع مهندس فخلي بالك عشان الزيارات في السجن صعبة خصوصا لو بقاله 24 شهر.
#الثورات_دائمة
#ضد_الإستقطاب
RESPECTFULLY YOURS’
M.ELHlwany

اسم السجين (اسم الشهرة) : شريف العفيفي النوع الاجتماعي : ذكر تاريخ تحرير أو نشر الرسالة : 11/3/2016 السن وقت...

أنا الدكتورة بسمة رفعت عبدالمنعم طبيبة مصرية معتقلة على ذمة قضة مقتل النائب وموجه إليَّ تهمة باطلة وهى انتمائي لجماعة الاخوان المسلمين ولم يوجه إليَّ أي تهمة لها علاقة بمسرح الجريمة ولم أنتمي لأي جماعة سياسية طوال حياتي.
ثماني أشهر أقبع في السجن بغير ذنب اقترفته وانا محرومة من رؤية اطفالي احدهما رضيع والاخرى لا تتعدى ستة سنوات وطفلي لم يعد يعرفني ولم يعي انني أمه وينظر إليَّ كل مرة وكأن عيناه تعاتبني ( أين ذهبتي وتركتيني ؟! ) وطفلتي ذات الخمس أعوام دخلت عامها الدراسي ولست معها ولم يوجد من يرعاهم غير أبي وأمي اللذان يتعدا عمرهم 72 عاما, فزوجي أيضا محبوس على ذمة نفس القضية يمكث في سجن الموت ( سجن العقرب ).
أبي وأمي تجاوزا اعمارهم 72 عاما يحتاجون من يرعاهم, فكيف يقوما برعاية أطفال صغار؟
كل هذا من أجل من؟ وبأي ذنب يوجه إليَّ أنا وزوجي تهمة الأنضمام للأخوان وهى تهمة باطلة لا صحة ولا أساس لها ولا دليل عليها ولا شهود إثبات غير افراد شرطة يدعى أحدهم ذلك ودليله: (مصدر سري مجهول).
233 يوم أحرم من أطفالي وينفطر قلبي كل يوم وتسوء حالتي الصحية, لذا أعلـن عن اضـــــرابي المفتـــــوح عن الطعام حتى يتحقق العدل وحتى يتحقق القانون الذي ينص على إخلاء سبيل احدى الزوجين المحبوسين على ذمة قضية واحدة ولديهم أطفال صغار.
أدخل #اضـــرابي عن الطعـــام لأن العدالة غابت وصمت صوت الانسانية وخفقت أضواء حقوق المرأة والطفل وحقوق الانسان التي يتشدقون بها
فأين هم من امرأة أم لأطفال صغار محبوسة ظلم ؟
وأين #نقابة_الأطباء من اعتقال طبيبة بغير ذنب ؟
واني لا أملك الا ان أدعوا الله يردني لأطفالي كما رد سيدنا موسى عليه السلام إلى أمه,
ويقيني بالله انه الناصر العظيم لا محال له سينصر المظلوم وانه يعلم أنني ظلمت وحرمت من أطفالي وتم تعذيبي دون ذنب او جريمة. الأربعاء 26/10/2016
سجن القناطر

ما ندفعه ثمن قليل للتغيير في مصر
"ومن جاهد فإنما يجاهد لنفسه...."
ما ندفعه من حريتنا ومعاناة أهلنا وأموالنا هو ثمن قليل من أجل التغيير في مصر، هو ثمن قليل للوصول إلى وطن أفضل لنا جميعا، ثمن قليل للحفاظ على الدولة بتجديد وإصلاح مؤسساتها عبر نظام ديمقراطي حقيقي وتماسك مجتمعي قادر على تلبية متطلبات العيش الكريم للمصريين جميعا.
مر عام على حبسي ولكن لم ولن يتملكني اليأس في رؤية غد أفضل

اسم السجين (اسم الشهرة) : يوسف الدموكي النوع الاجتماعي : ذكر تاريخ تحرير أو نشر الرسالة : 10/16/2016 السن وقت...