اسم السجين (اسم الشهرة) : احمد فؤاد محمد السيد (احمد فؤاد)

النوع الاجتماعي : ذكر

تاريخ تحرير أو نشر الرسالة : 6/11/2015

السن وقت الاحتجاز: غير معلوم

الوظيفة – نشاط بالمجال العام: مراسل صحفي بموقع كرموز وطالب بكلية العلوم بجامعة الإسكندرية

مكان احتجاز المرسل : مكان احتجاز غير معلوم

جدو جدو هي الأوضة دي طول عمرها ضلمة كدة؟

“- جدو جدو هي الأوضة دي طول عمرها ضلمة كدة؟
* لأ كان في لمبات زي اللمبات الثلاث اللي هناك.
– وراحوا فين؟
* انطفت مبقاش ليها معنى.
– ولما كانت منورة أنتم كنتم فين؟
* كنا هنا برضو ومحدش قدر ينضف الأوضة صح ففضلنا قاعدين، ما هو أنت عارف بقى إن إحنا بنعيش في المكان القذر اللي مافيهوش تغيير مع إن ربنا قال في كتابه: “وإن أوهن البيوت لبيت العنكبوت”.
رغم كده محدش يقدر يمسحنا من الأوضة لحد ما عشنا في أركانها كلها. – مش الكائنات اللي عايشة تحتنا دي ممكن تنضف الأوضة؟ مش هم دول البشر؟
* لأ دول أنصاف البشر.
– يعني إيه أنصاف؟!
* بتسأل كتير أوي! هتعرف مع الوقت.
– طيب إيه الحروف اللي على اللمبات دي؟
* ده حرف اسمه (ألف)، والتاني اسمه (ميم)، والثالث اسمه (لام).
– يعني إيه؟
* مش عارف معناهم إيه بس الكائنات دي عارفة، سمعتهم بيقولوا قبل كده مش هنقدر نعيش غير باللمبات دي، مع إن اللمبات اللي انطفت قبل كده كان عليها حروف وبتمثلهم معنى برضو، ولما انطفت عاشوا من غيرها، كان في لمبتين جنب بعض واحدة مكتوب عليها حرف (حاء) والتانية مكتوب عليها حرف (قاف)، وكمان كان فىه 3 لمبات عليها حروف (عين) و(دال) و(لام)، ولمبات كتير انطفت عشان معناها انطفى.
– إيه الصوت ده يا جدو؟
* ده صوت مولود جديد.
– إلحق إلحق يا جدو شوفت إللي حصل! حرف الـ(لام) اتبدل مع حرف الـ(ميم).
* يبقى ده شعار المرحلة القادمة يا حبيبي.”