اسم السجين (اسم الشهرة) : فكريه محمد محمد محمد (رانيا الشيخ)
النوع الاجتماعي : أنثى
تاريخ تحرير أو نشر الرسالة : 6/21/2015
السن وقت الاحتجاز: 19 عام
الوظيفة – نشاط بالمجال العام: طالبة ثانوي
مكان احتجاز المرسل : سجن المنصورة العمومي
عدت سنة
#عدت_سنه
بكل مافيها من حلو ووحش … المهم انها الحمد لله عدت
سنه 12 شهر 48 اسبوع 365 يوم … فاضل زيهم بس عادى على فكرة وايه يعنى هيعدو برضه .. هكون اتعلمت حجات كتير احلى واكتر واهم
هحاول اعلم الناس برضه حجات اكتر .. عرفت فى السنه اللى عدت دى قيمة ناس كتير .. واهمهم امى والجدع أحمد المصرى ❤
عدت سنه بالموت من البرد فى عز الشتا والموت من الخوف من الصراصير فى عز الصيف . استنيت حجات كتير تحصل ومحصلتش ومنتظرتش حجات كتير حصلت وتعاملت مع كائنات عمرى ماكنت اتخيل وجودهم فى الحياه لولا دخولى المعتقا
حسيت طعم الراحة وقد ايه وجودى فى المعتقل اهون 100 مرة من الاحساس اللى كنت بحسه مع اى معتقل وانا بره . وبرضه شفت عتمة الزنزانة لاخوانا رد السجون ” التأديب ”
اتعرفت على سناء وسمر وناهد ويارا وسلوى وحنان .. ويسرا ومنه وأبرار وهبه والاء وسارة وشيماء وطنط سامية .. أجمل بنات فى الدنيا … وحقيقى اتعلمت منهم حجات كتير اوى حلوة وجميلة بمعنى الكلمة .
حسيت قيمة الحرية من القيود والذل من الكرامة والضعف من القوة .. عرفت افرق بين حجات كتير واخد قرار لنفسى بدون تردد وخوف .. عرفت ان عندى ارادة اعمل اى حاجة احب انى اعملها مهما كانت صعبة ، اكتشفت حجات كتير ى نفسى وعارفة ان خسارة وجودى هنا اقل من المكسب بكتير اوى .. ومع كل ده سعات بحس ان الموت هون ميت الف مرة من وجودى هنا لكن كل فعل بعمله بيفكرنى انى لازم اكون سعيدة بكل الحجات الجميلة اللى اتعلمتها ، لكن مش سعيدة على حرمانى من امى واخواتى وابويا .. حجات كتير ضد بعضها .. بس فى الاخر عارفة ان الايجابيات افضل كتير
لما بيكون نفسى اطمن على حد معين بحاول اشوف السما واتكلم قال يعنى الشخص هيكون سامعنى وبدخل فى حوار عميق فعلا .. وسعات بخاف اكون اتجننت .. بس عموما السما هيا الشيئ الوحيد اللى ميقدروش يمنعونا عنها وكلنا ممكن نكلم بعض عن طريقها ونشوفها فى نفس الوقت ❤
انا حقيقى بكون فى عز قوتى وثباتى لما بعرف عنكم خبر خير وبكون فى عز ضعفى وقلة حيلتى لما بحس ان اليأس سيطر عليكم … خدوا بالكم من بعض … اصحابى اللى كملو معايا واللى اتخلو عنى … خليكم مع بعض … مع بعض ديما احنا اقوى واجمد
#دائما_انتم_فى_قلبى_ولا_تحزنوا_ان_الله_معنا
#دمتم_دائما_احرار
#اليأس_خيانه
#الحرية_للمعتقلين
#رانيا_الشيخ
