اسم السجين (اسم الشهرة) : كريم شلبي طه متولي (كريم طه)

النوع الاجتماعي : ذكر

تاريخ تحرير أو نشر الرسالة : 5/16/2014

السن وقت الاحتجاز: غير معلوم

الوظيفة – نشاط بالمجال العام: عضو بحركة 6 أبريل

مكان احتجاز المرسل : سجن الفيوم العمومي (دمو)

برقية إلى السيد رئيس الجمهورية .. عدلى منصور

برقية إلى السيد رئيس الجمهورية .. عدلى منصور . دباجة مرسلة ( يعنى بعد التحية و السلام و ال 50 شمعة دول , و ال 7 طلقات حايرين طايرين فى الهوا , و دوس بالزرار على الدبابة وسمعنى صوت الديابة , و زى ما خشبة الميت ليها إحترامها .. المسرح له إحترامه يا جدعان ) . أما بعد .. إنت فين ياعم !!!! بقالك شويه قاطع بينا !! فى حاجة مزعلاك !! ده حتى مفيش لا سلام ولا كلام !! بقالى 109 يوم فى السجن مسمعتش عنك لا حس ولا خبر !! بيني وبينك “عزازيل” صايع و مش بيبطل وسوسه , يعنى مرة يقولى إنك قابلت وجه كريم , و مرة يقولى إنك بعافية شوية وجالك فيروس خطير إسمه ( كورونا ) و مش لاقيين علاج ليه , حتى القوات المسلحة مش عارفة تخترعله جهاز زى بتاع السرطان وفيروس سي , عزازيل أخر مرة بيقولى إن قيادات الجيش ماسكين عليك مقطع بلوتوث ساخن .. يااا نمس . سيادة الريس , أبعث إليك شاكيا بعد الله عز وجل و أعلم جيدا أنك لن تخذلنى , مطلبي واحد , محتاج رجل مثلك أب حنون .. طيب القلب .. واسع الصدر .. عريض المنكبين .. خفيف الطلة .. كبير الفخذين .. يسمع شكواى بأذان صاغية . مصر بتضيع يا سيادة الريس , الناس بتضرب بعضها فى الشوارع , و الدم مغرق الميادين , الشباب كتير فى الزنازين بيناموا واقفين من الزحمة زى شقق إسكان الطلبه المغتربين فى الحى السادس .. و إنت ولا هنا !!! اللى يتم تلفيق رزمة قواضى ليه , واللى تم القبض عليه عشوائى , واللى إتاخذ من على السرير !!! إنت ساكت ليه ؟!! حاسس إنك هترد عليا وتقولى : تصدق فاجئتنى !! “زي الليمبى” . أعى تماما خطورة المرحلة , كما أعلم أنك لا تنام من أجل هذا الوطن , ولا تجد وقت لتأكل طعامك ( والجيش محددلك إقامتك و كلامك و قراراتك ) .. اللى بين القوسين ده مش كلامى , ده وسوسه “عزازيل” . إعمل أى حاجه يا سيادة الريس , أى خطوة , خد أى قرار لأى مشكلة . عايز أفتكرلك أى حاجه عملتها .. إنت معايا ؟؟!! سيادة الريس .. سيادة الريس .. يا برنس !!! بقولكم إيه يا جدعان محدش يرسله تانى , هو كده تمام . هى الساعة كام ؟؟ ياااه الوقت إتأخر أوى , ربنا يتمم بخير , ومنجلكوش فى حاجه وحشه . سلاموا عليكم . المرسل إليه فخامة السيد رئيس الجمهوريه “عدلى منصور” . المرسل المعتقل “كريم طه”