اسم السجين (اسم الشهرة) : لؤي محمد عبد الرحمن ابو زيد (لؤي القهوجي)

النوع الاجتماعي : ذكر

تاريخ تحرير أو نشر الرسالة : 5/3/2014

السن وقت الاحتجاز: 28 عام

الوظيفة – نشاط بالمجال العام: –

مكان احتجاز المرسل : منطقة سجون برج العرب

ازيكو يا ولاد

ازيكو يا ولاد
مش عارف مدى سوء حالتكو النفسية ولا أد ايه متعكنين فقلت من موقعي هذا أعكنن عليكو أكتر واكتبلكو..
ومفيش حاجة جديدة فقلت أقول انكو واحشني واكتبولي
انت فعلا ناوي تحضر الجلسة يا يوسف؟ .. أنا لو منك ما أجيش..خليك لما نشوف هتنتهي على ايه ..على العموم القرار قرارك. صحيح هو سالم وسارة اتجوزوا خلاص؟ أصلي لحد دلوقت معرفش الصراحة
هي جلسة ماهي يوم 20 دي جلسة حكم ولا ممكن تتأجل ولا ماعندكوش فكرة؟..معلش أصلي ماعنديش التفاصيل اللي عندكو فباسأل في موضوع أكيد اتكلمتوا فيه كتير. شريف فرج منه لله نقلي الخبر منقوص وبيتني ليلة سواد ..عموما يا رنوة انتي عيدميلادك زي عيد ميلادي بيكونوا أيام فقر .. شهر مايو كله فقر بس خير ان شاء الله.
بكرة يوم الأسير العالمي، أنا كنت ناسي تماما لحد ما جابوا سيرة الموضوع وكالعادة الاخوان أساتذة في افساد أي شيء ورقصهم علي السلالم زي ما هو فلا بيرحموا ولا بيخلوا رحمة ربنا تنزل. مبدئيا سجن برج العرب غير باقي السجون فمش حيدخلوا في اضراب بس هيرفضوا أكل السجن لمدة يوم كاجراء قال ايه رمزي! وهيرفعوا شوية مطالب لادارة السجن .. طبعا أنا ماليش أي علاقة بالطرفين سواء الاخوان أو ادارة السجن. فالموضوع بعيد عني ..كفاية جاتهم نيلة هم الاتنين.
عايزكو تكتبوا أي خطابات لاسلام.. الولد فعلا بطل، صموده لما عرف وفاة والده كسفني من نفسي لأني كنت فاكره هش ومالوش فيها .. ده أنا اللي طلع ماليش فيها .. هانبسط أوي لما تجيله خطابات من طرفي